Соғлиқни сақлаш вазирлиги фуқароларни карантин қоидалари ва чекловларига қатъий риоя қилишга ва оммавий йиғилишларда қатнашмасликка чақирди.
ССВ Махсус комиссия оммавий байрамларнинг барча турлари, спорт мусобақалари, шунингдек концертлар, фестиваллар, театр ва кино намойишлари учун вақтинча чеклов қўйганини эслатиб ўтди. Бундан ташқари, 50 нафардан кўп бўлган кишилар бир жойда, бир вақтнинг ўзида тўпланмаслиги тавсия этилмоқда, дея қўшимча қилинади хабарда.
«Бироқ шунга қарамай, айрим ҳолларда карантин қоидалари ва чекловлари қўпол равишда бузилаётган ҳолатлар ҳам кузатилмоқда», — дейди ССВ, 13 июль куни россиялик блогерни кутиб олиш учун Амир хиёбонида 150−200га яқин фуқаролар тўплангани ҳақида.
«Ижтимоий тармоқлар ва интернет сайтларида тарқалган ушбу тадбир акс этган видеотасвирлардан кўриш мумкинки, бу йиғинда иштирок этган ёшлар томонидан мамлакатимизда ўрнатилган ижтимоий масофа сақлаш, ниқоб тақиш каби карантин қоидаларига мутлақо риоя этилмаган», — дейилади хабарда.
Қайд этилишича, бу ҳолат коронавирус инфекциясининг янада кенг тарқалиши ва эпидемиологик вазият янада оғирлашишига олиб келиши мумкин. Касалликнинг янги штаммлари тез юқиши, жадал ривожланиши ҳамда яширин равишда организмни кучли жароҳатлаши кузатилмоқда. Инсон ўз организмида кечаётган жараённи билмай қолиши ҳам мумкин.
Вазирлик барча фуқароларни карантин қоидалари ва чекловлари, санитария ва гигиена талабларига қатъий риоя этишга, оммавий тўпланмасликка чақирди. Шунингдек, ота-оналар ўз фарзандларига бу борада тегишли тушунтириш беришлари, кўпчилик тўпланадиган жойлардан узоқ бўлишларига эътибор қаратишлари сўралди.
«Зеро, биргина эътиборсизлик, лоқайдлик, ўзимиз ва яқинларимиз саломатлигини хавф остига қўйиши, COVID-19 инфекциясининг юртимиз аҳолиси орасида янада кенг тарқалиб кетишига сабаб бўлиши мумкин», — дея қўшимча қилинади ССВ хабарида.
ССВ Маъмурий жавобгарлик тўғрисидаги кодексига мувофиқ, эпидемияларга қарши курашиш қоидаларини бузиш тегишли тартибда жавобгарликка тортишга сабаб бўлишини эслатиб ўтди.
Аввалроқ Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов ҳам ушбу ҳолат бўйича фикр билдириб, россиялик блогер Субхан Мамедов (Subo) билан профилактик суҳбат эмас, балки «унга нисбатан ёлғон маълумот тарқатиб, жамоат тартиби ва соғлигига хавф туғдиргани, йиғилишлар ўтказиш тартибини бузгани» нуқтаи назаридан ҳуқуқий баҳо берилиши кераклигини таъкидлаган эди.
