Фото: Шавкат Мирзиёев Ислом цивилизацияси маркази қурилишини кўздан кечирди
Жума куни Шавкат Мирзиёев Ислом цивилизацияси марказига ташриф буюрди. Унинг қурилиши қарийб тўрт йилдан бери давом этмоқда, бугунги кунда пардозлаш ишлари олиб борилмоқда. Мажмуанинг биринчи қаватида музей омбори, қадимий қўлёзма ва осори-атиқаларни сақлаш хоналари жойлашган. Бинонинг 65 метр баландликдаги гумбази остига эса Ислом оламининг дурдонаси бўлмиш Усмон мусҳафи қўйилиши режа қилинган.
«Бу қўшнилар ўртасидаги ҳамкорлик». ХТВ раҳбари ўринбосари Ўзбекистон нега қўшни давлатларга мактаб қуриб бераётгани ҳақида
ХТВ раҳбарининг биринчи ўринбосари Усмон Шарифхўжаев Ўзбекистон ўзи мактабларга муҳтож бир вақтда, нега қўшни давлатларга таълим муассасалари қуриб бераётганини изоҳлади. «Қирғизистон Риштонда мактабгача таълим муассасаси, Тожикистон Ургутда мактаб қуриб берган… Бу фақат қўшниларнинг ўртасидаги ҳамкорлик», — деди у. Қолаверса, Ўзбекистонда 1,2 млн ўқувчи ўрнини яратиш учун алоҳида дастур ишлаб чиқилаётгани маълум қилинди.
Шавкат Мирзиёев Қирғизистонга ташриф буюриши кутилмоқда
Ўзбекистон ва Қирғизистон президентлари телефон орқали мулоқот қилди. Садир Жапаров Шавкат Мирзиёевнинг жавоб ташрифи билан Қирғизистонга бориши стратегик шерикликни янада мустаҳкамлашини таъкидлади. Бундан ташқари, Ўзбекистонга иккита мактаб қурилиши ва Бобур номидаги Ўш академик театри реконструкцияси учун миннатдорчилик билдирилди.
Нега Ўзбекистон Россияни Инсон ҳуқуқлари кенгашидан чиқариш бўйича қарорга қарши овоз берди?
Ўзбекистон Россиянинг БМТ Инсон ҳуқуқлари кенгашидаги аъзолигини тўхтатиб туриш бўйича резолюцияга қарши овоз берди. Мамлакатнинг БМТдаги доимий вакили Бахтиёр Ибрагимов бундай қарорлар «гумонланаётган инсон ҳуқуқлари бузилишининг пухта тергови натижасига» асосланган бўлиши кераклигини таъкидлади. Қозоғистон ва Қирғизистон делегациялари вакиллари ҳам шунга ўхшаш баёнотлар билан чиқишди. CNN Россия ташкилот аъзо-давлатларига резолюцияга овоз бериш «оқибатлари» ҳақида огоҳлантириб, нота жўнатганлигини таъкидлади.
Дам олиш кунлари қисқа муддатли ёмғир ёғиши ва иссиқ бўлиши кутилмоқда
Дам олиш кунлари ҳаво ҳарорати +35 даражагача кўтарилади. Туркманистондан зич булут қатламлари кириб келиши эвазига айрим ҳудудларда момақалдироқ бўлиши ва ёмғир ёғиши кутилмоқда.
Сурхондарёда Афғонистон фуқаролари учун қисқа муддатли ўқув курслари ташкил этилади
Термиздаги Афғонистон фуқароларини ўқитиш таълим марказида гуманитар, педагогика ва муҳандислик соҳалари бўйича қисқа муддатли ўқув курсларини ташкил этиш режалаштирилмоқда. Унда 345 нафар афғонистонлик бепул таҳсил олиши мумкин бўлади. Европа Иттифоқи мазкур ташаббус учун 1 млн евро ажратди.
ОТМларга ўқишни кўчириш бўйича ўтиш баллари эълон қилинди
Олий ва ўрта махсус таълим вазирлиги ўқишини чет элдан кўчириш истагида бўлган талабаларнинг имтиҳонларга тайёрланишга етарлича вақти бўлиши учун давлат ОТМларга ўқишни кўчириш бўйича ўтиш балларини 4 ой олдин эълон қилди. Жорий йилда 100 минг талабанинг ўқишини чет элдан кўчириши кутилмоқда.
Пластик картага пенсия оладиганларга 1 фоиз қўшимча тўлов тўланади
1 майдан бошлаб пенсия ва нафақа пулларини банк карталарига оладиганлар учун 1% қўшимча тўлов тўлаб берилади. Нақд пулда пенсия, нафақа ва моддий ёрдам пулларини етказиб бериш хизматлари учун эса «Халқ банки»га 1 фоиз хизмат ҳаққи тўлаб берилади. Бу маблағлар пенсия ва нафақа олувчилар ҳисобидан эмас, Пенсия жамғармаси ва бюджет пулларидан қопланади.
«Фарҳод деҳқон бозори» директори ва ўринбосарига жиноят иши очилди
Тадбиркордан савдо нуқтаси учун ноқонуний пул талаб қилган «Фарҳод деҳқон бозори» директори ва унинг хавфсизлик бўйича ўринбосарига жиноят иши қўзғатилди. Улар ушбу бозорга хизмат кўрсатувчи банк кассири орқали 3,4 млн сўм олмоқчи бўлган.
2021 йилда қарийб 32 минг ўзбекистонлик Россия фуқаролигини олди
2021 йилда 735,4 мингдан зиёд хорижлик Россия фуқаролигини қўлга киритди. Ушбу кўрсаткич камида 2000 йилдан буён рекорд натижа ҳисобланади. Ўтган йили Россия паспортини олган ўзбекистонликлар сони эса 2020 йилга нисбатан 8,8 минг кишига кўпайиб, 31,9 минг нафарни ташкил этди.
Муса Жаманбаев Қирғизистоннинг Ўзбекистондаги элчиси этиб тайинланди
Қирғизистон президенти протокол хизматини бошқарган Муса Жаманбаев мамлакатнинг Ўзбекистондаги элчиси этиб тайинланди.
Ўзбекистонда туризм соҳаси жадал суръатлар билан тикланмоқда — Туризм вазирлиги
Тошкентдаги меҳмонхона ва ҳостеллар бандлиги март ойининг сўнгги кунларида 83,6 фоизни, республикада эса 70,8 фоизни ташкил этди. Туризм ва маданий мерос вазирлиги маълумотларига кўра, ушбу рақамлар туризм соҳасининг тикланишидан далолат беради. Йил охиригача Ўзбекистонда 4,5 миллионгача сайёҳ келиши кутилмоқда.
«Газета.uz»да эълон қилинган мақолалар:
Ўзбекистон қаерда жойлашган? — Украинада уруш бошланганидан сўнг Россия ва Беларусь интернет фойдаланувчиларининг Ўзбекистонга бўлган қизиқиши қандай ўзгарди
24 февраль куни Россиянинг Украина ҳудудида ҳарбий операция бошлаши ортидан Россия ва Беларусь интернет фойдаланувчилари орасида Ўзбекистонга бўлган қизиқиш кескин ортиб кетди. Google`да 1000 рубль ўзбек сўмида қанча бўлиши, Москвадан Ўзбекистонгача бўлган билетлар, Ўзбекистонга кириш қоидалари ва бошқа сўровлар кескин ортган.
Ўзбекистон Афғонистонда кўкнори етиштиришга қўйилган тақиқни олқишлайди — Исматулла Иргашев
Ўзбекистон президентининг Афғонистон бўйича махсус вакили Исматулла Иргашев қўшни мамлакатнинг муваққат ҳукумати томонидан кўкнори етиштиришни тақиқланишини қўллаб-қувватлашини билдирди. У «Газета.uz»га берган интервьюсида бу қарорни Афғонистондаги гиёҳвандлик моддалари муаммосини илдизи билан йўқ қилишдаги муҳим қарор деб атади. Бу эса мамлакат халқаро террорчилар паноҳига айланмаслигига аниқ сигнал эканлиги таъкидланди.
