Сиёсат
Ўзбекистон, Қирғизистон ва Қозоғистон Қамбарота ГЭС қурилиши ва эксплуатациясига тайёргарлик бўйича битим имзолади
Ўзбекистон, Қирғизистон ва Қозоғистон Энергетика вазирликлари Қамбарота ГЭС-1 қурилиши ва эксплуатацияси лойиҳасини амалга оширишга тайёргарлик бўйича уч томонлама битим имзолади. Уни қуриш бўйича Мувофиқлаштирувчи донорлик қўмитаси тузилди, унинг таркибига Жаҳон банки, ОТБ, ЕТТБ ва бошқалар киради.
«Одамлар расмийларни очиқчасига танқид қила олиши керак» — HRW
Human Rights Watch ташкилоти Ўзбекистонни президентни онлайн ҳақоратлаш жиноятини бекор қилишга чақирди. Ташкилотга кўра, «одамлар очиқ, репрессиядан қўрқмай танқид қила олиши керак». Ҳуқуқ фаоллари президентни туҳмат ва ҳақорат қилганлик учун алоҳида жавобгарлик белгилаш шарт эмаслигини айтмоқда.
Жиззах вилояти ҳокимига янги ўринбосар тайинланди
Сардор Шукуруллаев Жиззах вилояти ҳокимининг туризм, маданият, маданий мерос ва оммавий коммуникациялар масалалари бўйича ўринбосари бўлди.
Шавкат Мирзиёев АҚШ савдо вакили билан ҳамкорликни чуқурлаштиришни муҳокама қилди
Ўзбекистон президенти АҚШ савдо вакили Кэтрин Тай билан учрашиб, мамлакатнинг ЖСТга аъзо бўлиши, GSP тизимини қайта тиклаш, C5+1 формати ҳамда Савдо ва инвестициялар бўйича ҳадли битим доирасида амалий ҳамкорликни чуқурлаштириш масалаларини муҳокама қилди.
Корея Республикаси президенти 13−15 июнь кунлари Ўзбекистонда бўлади
Корея Республикаси президенти Юн Сок Ёль 13−15 июнь кунлари давлат ташрифи билан Ўзбекистонда бўлади. Ташриф доирасида бир қатор йўналишларда ҳамкорликни кенгайтириш, Ўзбекистон-Корея стратегик шериклик муносабатларини ривожлантириш, қўшма бизнес форуми ўтказиш режалаштирилган.
Иқтисодиёт
«Навоийазот» нарх манипуляцияси орқали 20,5 млрд сўм даромад олган — Рақобат қўмитаси
Рақобат қўмитаси «Навоийазот» ишлаб чиқарган юқори ликвидли ва монопол турдаги маҳсулотлар биржа орқали сотилишида нарх манипуляцияси ҳолатларини аниқлади. Минерал ўғитлар бозорида устун мавқега эга жамият жами 20,5 млрд сўм асоссиз даромад олган.
Май ойида аҳолининг инфляцион кутилмалари ўзгаришсиз қолди, бизнесники эса пасайди
Ўзбекистонда аҳолининг келгуси 12 ой учун инфляцион кутилмалари май ойида 14 фоизни ташкил этди ва ўтган ойга нисбатан ўзгаришсиз қолди. Тадбиркорларнинг кутилмалари эса пасайди. Аҳоли учун ҳам, бизнес учун ҳам кутилмалардаги асосий омил коммунал хизматларнинг қимматлашиши бўлиб турибди.
Жамият
«Вазият назорат остида». «Ҳисорак» сув омборидан сув сизиб чиқди (+видео)
Қашқадарёдаги «Ҳисорак» сув омборидаги техник тадбирлар вақтида тўғондан сув сизиб чиқди. ФВВ ҳодисада ҳеч ким жароҳатланмагани, сув омборига шикаст етмагани ва вазият тўлиқ назорат остида эканини билдирди.
Ўзбекистонда Қурбон ҳайити 16 июнда нишонланади
Президент қарорига кўра, Қурбон ҳайити 16 июнь — якшанба куни нишонланади. Ҳафтасига 5 кун ишлайдиган ўзбекистонликлар кетма-кет 4 кун дам олади: 17 июнь кўчирилган дам олиш куни, 18 июнь эса барча ходимлар учун қўшимча дам олиш куни бўлади.
Тожикистондаги зилзила кучи яна Ўзбекистон жанубида сезилди
Тожикистонда содир бўлган 4,3 магнитудали зилзила кучи Сурхондарё вилояти туманларида 2−3 балл даражасида сезилди. Ер силкиниши бир кун аввал ҳам худди шу ҳудудларда қайд этилганди.
Ўзбекистоннинг қатор ҳудудларида чигирткаларга қарши кимёвий кураш олиб борилмоқда (видео)
Тармоқларда йўлларда чигирткалар тўдаси учиб юргани акс этган видеолар тарқалди. Ўсимликлар карантини ва ҳимояси агентлиги Қорақалпоғистон, Навоий, Бухоро ва Самарқанд ҳудудларида уларга қарши кимёвий кураш олиб борилаётгани, чигиртканинг бу тури фақат саксовул билан озиқланишини билдирди.
Бухорода боласини 2 йилдан буён калтаклаб келган аёл 3 йилга қамалди
Шофиркон туманида боласини икки йилдан буён калтаклаб, қийнаб келган аёл 3 йилга озодликдан маҳрум қилинди. 6 ёшли болага васий тайинланиб, унга топширилди. Болалар омбудсмани аёлни оналик ҳуқуқидан маҳрум қилиш масаласи ҳам кўрилаётганини билдирди.
«Ҳеч қандай фавқулодда вазият содир бўлмаган» — ФВВ раҳбари «Ҳисорак» сув омборидаги ҳолат ҳақида
Фавқулодда вазиятлар вазири Абдулла Қўлдошев «Ҳисорак» сув омборида ҳеч қандай фавқулодда ҳолат юз бермаганини маълум қилди. Унинг қайд этишича, 10 июнь куни сув омборида сув ташлаш ишлари амалга оширилган, иншоотдаги ишлар эса олдиндан режалаштирилган тизимда давом этмоқда.
Навоийдаги ЙТҲ оқибатида 6 киши вафот этди
Нурота туманида Onix автомобили Damas`ни қувиб ўтмоқчи бўлганида қарама-қарши йўналишдаги Gentra билан тўқнашди. Оқибатда бир оиланинг 5 аъзоси (хусусан, 2 ёшли бола ва 2 ойлик қиз) ҳамда бир ҳайдовчи вафот этди.
Самарқандда Damas йўл четидаги 2 нафар пиёдани уриб кетди
Тойлоқ туманида бошқарувни йўқотган Damas икки нафар пиёдани уриб юборди. Воқеа сабаб пиёдалар ва Damas ичидаги йўловчи жароҳат олди.
ЖИБ туман, шаҳар судларида тергов судьяси лавозими жорий этилади
️Президент фармони билан жиноят ишлари бўйича туман, шаҳар судларида тергов судьяси лавозими жорий этилмоқда. Уларга судга қадар иш юритув даврида процессуал қарорларга санкция бериш ва маъмурий ҳуқуқбузарликлар тўғрисидаги ишларни кўриб чиқиш ваколати берилади.
Ўзбекистонда 2023 йилда одам савдоси билан 126 нафар шахс судланган
Ўзбекистонда 2023 йилда одам савдоси билан 126 нафар фуқаро судланган. Уларнинг 84 нафарига озодликдан маҳрум қилиш, 42 нафарига эса шартли ва озодликни чеклаш жазоси тайинланган. Жиноят оқибатида, жумладан, 24 нафар 3 ёшгача бўлган чақалоқлар жабрланган.
Сергелидаги автосервисда ёнғин чиқиб, 3 та автомобиль зарарланди (видео)
Пойтахтнинг Сергели туманидаги автосалон олдида жойлашган автосервисда ёнғин содир бўлди. Оқибатда автосервиснинг ички қисми ва 3 та автомобиль ёниб зарарланди. ФВБ жароҳатланганлар тўғрисида маълумот келиб тушмаганини қайд этди.
«Газета.uz» Ўзбекистон футбол терма жамоасининг Олимпия ўйинларигача бўлган йўли ҳақида ҳужжатли фильм тайёрламоқда
Фильм Ўзбекистон ёшлар терма жамоасининг 2024 йилда Парижда бўлиб ўтадиган Олимпиададаги тарихий иштироки томон босиб ўтган йўли ҳақида ҳикоя қилади.
«Ҳисорак» сув омборидаги ҳолат ҳақида ёлғон хабарлар тарқатган шахсларга нисбатан жиноят иши қўзғатилди
Қашқадарё вилояти ИИБ «Ҳисорак» сув омборидан сув сизиб чиқиш ҳолати ҳақида интернетда ёлғон хабар тарқатиб, «одамларнинг тинчини бузиб, фуқароларнинг ҳуқуқлари ва қонун билан қўриқланадиган манфаатларига зарар етказилишига сабабчи бўлган» шахсларга нисбатан жиноят иши қўзғатилганини маълум қилди.
Тошкентда 3 та машина ва минивен тўқнашди
Тошкент шаҳри Чилонзор туманида 4 та транспорт воситаси иштирокида ЙТҲ юз берди. Тўқнашувда ҳеч ким жароҳатланмади.
Жаҳон
БМТ Хавфсизлик кенгаши АҚШнинг Ғазода ўт очишни тўхтатиш бўйича резолюция лойиҳасини қабул қилди
БМТ Хавфсизлик кенгаши АҚШ президенти Жо Байденнинг Ғазо секторида ўт очишни тўхтатиш ва гаровга олинганларни озод қилиш режасига розилик билдиришга чорловчи резолюция лойиҳасини қабул қилди. Овоз беришда қатнашган мамлакатларнинг 14 таси ҳужжатни ёқлади.
Малави вице-президенти авиаҳалокатда вафот этди
Малави (Африка) вице-президенти Саулос Чилима ва яна 9 киши бўлган самолёт қулаб, бортдагиларнинг барчаси ҳалок бўлди. 10 йилдан бери ушбу лавозимда ишлаб келган Чилима навбатдаги сайловларда президентликка номзод бўлиши кутилаётганди.
Бизни ўқиётганингиз учун раҳмат!
