БМТ Хавфсизлик кенгаши АҚШ президенти Жо Байден томонидан илгари сурилган Ғазо секторида ўт очишни тўхтатиш ва гаровга олинганларни озод қилиш режасига розилик билдиришга чорловчи резолюция лойиҳасини қабул қилди. Бу ҳақда The Guardian хабар берди.
Овоз бериш жараёнида қатнашган давлатларнинг 14 таси ҳужжатни ёқлади, Россия овоз беришдан тийилди.
Оқ уй маълумотларига кўра, режа уч босқичдан иборат бўлиб, биринчи босқичда вақтинча ўт очишни тўхтатиш, фаластинлик асирларни озод қилиш эвазига ҲАМАС томонидан гаровга олинганларни озод қилиш ва ўлган асирларнинг жасадларини топширишни назарда тутади. Иккинчи босқич Исроил қўшинларини Ғазо секторидан тўлиқ олиб чиқиб кетиш, шунингдек, «ҳарбий ҳаракатларни доимий тўхтатиш»ни ўз ичига олади. Учинчи босқичда АҚШ ва халқаро ҳамжамият кўмагида минтақани қайта тиклаш бўйича кенг кўламли режани амалга ошириш назарда тутилган.
АҚШнинг БМТдаги доимий вакили Линда Томас-Гринфилд резолюция лойиҳаси қабул қилинганидан сўнг ўз нутқида Хавфсизлик кенгаши қарорини олқишлаб, «бугун биз тинчлик учун овоз бердик» дея таъкидлади.
Ҳужжатда Исроил АҚШ таклиф қилган режага рози экани таъкидланган. Унда, шунингдек, ҲАМАСни ҳам ушбу таклифни қўллаб-қувватлашга чорлов мавжуд.
БМТ Хавфсизлик кенгаши қароридан кўп ўтмай, ҲАМАС ҳужжат қабул қилинганини олқишлашини эълон қилди. Бироқ гуруҳнинг ўт очишни тўхтатиш бўйича режага амалга қилиш нияти бор-йўқлиги номаълумлигича қолмоқда, деб ёзди The Guardian. Шунингдек, нашр резолюцияда Исроил режани қўллаб-қувватлаши ҳақида гап кетганига қарамай, мамлакат бош вазир Биньямин Нетаньяху бу борада танқидий фикрлар билдирганини эслатди. Хусусан, у ҲАМАСнинг ҳарбий салоҳиятини тўлиқ йўқ қилмасдан туриб, узоқ муддатли ўт очишни тўхтатиш бўйича ҳар қандай таклиф бефойда эканини айтганди.
