Европарламент Ўзбекистонни Россиянинг Украинага ҳарбий босқинини қоралашга чақирди. Бу ҳақда европалик депутатлар томонидан 4 октябрь куни қабул қилинган Ўзбекистон бўйича резолюцияда айтилган («Газета.uz» резолюция ҳақида батафсил ёзган).
Европарламентнинг қайд этишича, Россиянинг Украинага қарши босқинчилик уруши ва унинг оқибатлари Ўзбекистон ва Россия билан анъанавий яқин муносабатларни сақлаб келаётган Марказий Осиёнинг бошқа давлатлари учун ҳам муаммо, ҳам имкониятлар яратади.
«[Европа парламенти] Ўзбекистон Россиянинг Украинага ҳарбий аралашувини қораламаганидан афсусда ва расмийларни буни халқаро ҳамжамият талабларига мувофиқ қилишга чақиради», — дейилади резолюцияда.
Европа Иттифоқининг қонун чиқарувчи ва вакиллик органи собиқ ташқи ишлар вазири Абдулазиз Комиловнинг 2022 йил 17 март куни Украина мустақиллиги, суверенитети ва ҳудудий яхлитлигини тан олган ҳолда, Украинадаги ҳарбий ҳаракатларни зудлик билан тўхтатишни сўраган баёнотини олқишлади. Ўшанда ТИВ собиқ раҳбари Ўзбекистон Донецк ва Луганск республикаларининг мустақиллигини тан олмаслигини айтганди.
«Европарламент Ўзбекистон БМТ Бош Ассамблеясининг Украина бўйича, хусусан, 2022 йил 2 мартдаги (ўша пайтда Ўзбекистон иштирок этмаган), 2022 йил 24 март ва 2023 йил 23 февралдаги Россиянинг ҳужумини тўхтатиш ва қўшинларни Украинадан зудлик билан олиб чиқишни талаб қилувчи резолюциялар бўйича овоз беришда бетараф қолганидан афсусда.
Европарламент депутатлари, шунингдек, Ўзбекистон Россиянинг 2022 йил 7 апрелда БМТ Инсон ҳуқуқлари кенгашидан чиқарилишига қарши чиққани ва Президент Шавкат Мирзиёев 2023 йил 9 май куни Москвада бўлиб ўтган Ғалаба парадида иштирок этганидан афсусда.
Европа Иттифоқи Ўзбекистон сиёсий раҳбариятининг Россия ва Беларусга нисбатан жорий этилган санкцияларни четлаб ўтишга йўл қўймаслик мажбуриятини қайд этиб, расмийлар ушбу мажбуриятга амал қилишига умид билдирди.
Еврокомиссия Россияга қарши санкцияларнинг 11-роунди Марказий Осиё орқали санкциялардан қочишга қарши курашишга қаратилганлигини таъминлаши керак. Қайд этилишича, ўтган йилдан бери минтақа давлатлари ва Россия Федерацияси ўртасидаги товар айирбошлаш ҳажмининг кескин ошгани «Россия ва Беларусга санкцияланган товарлар ва технологияларни қайта жўнатиш пунктига айланиши мумкинлигидан далолат беради».
Европарламент Ўзбекистон ҳукумати ва халқи Украинага озиқ-овқат ва тиббий ёрдам кўрсатишни кучайтирганини олқишлайди ва уларни Украинага ёрдам кўрсатишни давом эттиришга таклиф қилади.
Шунингдек, Европа Иттифоқи органи Ўзбекистон турли сиёсий сабабларга кўра Россияни сафарбарлик ва шахсий эркинликларнинг бўғилиши фонида тарк этган кўплаб Россия фуқароларини қабул қилганини ҳам олқишлайди.
Европарламент депутатлари барқарор шериклик шароитида Европа Иттифоқининг энергия диверсификациясидаги Ўзбекистон табиий ресурслари салоҳиятини эътиборга олдилар ва шу билан бирга Ўзбекистоннинг тармоқ ислоҳотларини молиялаштириш, энергия самарадорлигини ошириш ва иссиқхона газлари чиқиндиларини камайтиришда ЕИнинг ҳал қилувчи ролини эътироф этдилар.
Европарламент Европа Иттифоқи ва Ўзбекистон ўртасидаги ўзаро англашув меморандуми ва икки томонлама маслаҳатлашувлар асосида ҳар икки томон ўз энергия ва экологик хавфсизлигини яхшилашга интилади, деб ҳисоблайди.
«Шу муносабат билан [Европа парламенти] Россия давлат компаниялари ва Ўзбекистоннинг газ секторидан фойда кўраётган россиялик сиёсий инсайдерларга берилган имтиёзлардан ҳамда Россиянинг газ етказиб бериш орқали сиёсий устунликка эришишга уринишларидан афсусда», — дейилади резолюцияда.
«Газета.uz» Европарламент Ўзбекистон бўйича резолюцияни қандай қабул қилгани, унда мамлакатнинг ютуқ ва муаммолари ҳамда Европа Иттифоқи тавсиялари келтирилгани ҳақида батафсил маълумот берганди. «Европа Иттифоқи Ўзбекистон учун яхши куч бўлишда давом этади… Шу билан бирга, биз ҳам дўстлар каби камчиликлар ҳақида очиқ гапирамиз», — деди Европарламент депутатларидан бири дебатда.
