Қўшма Штатлар Хитойга ҳарбий устунлик бериши мумкин бўлган технологияларнинг Хитой бозорига киришини қийинлаштириш мақсадида, чиплар ва уларни ишлаб чиқариш ускуналарини сотиб олиши бўйича чекловларни кучайтиришни режалаштирмоқда, деб ёзади Bloomberg.
Нашр манбаларига кўра, янги қоидалар 2022 йилнинг октябрь ойида жорий этилган савдо чекловларидаги бўшлиқларни ёпишга қаратилган. Ўшанда Америка ҳукумати Хитойга Америка технологиясидан фойдаланган ҳолда ишлаб чиқарилган сунъий интеллект чипларини сотишни чеклаганди.
АҚШ, хусусан, бошқа мамлакатлар орқали экспорт чекловларини четлаб ўтишга уринаётган Хитой компаниялари учун қўшимча текширувлар жорий этиш ниятида. Бунинг учун Хитойнинг чип ишлаб чиқарувчилари савдо чекловлари рўйхатига қўшилади, учинчи мамлакатлар ишлаб чиқарувчилари ушбу компаниялар буюртмаларини бажариш учун АҚШ лицензиясини олишларини талаб қилади, дея аниқлик киритади агентлик.
Янгиланган чекловлар шу ҳафта эълон қилинади, деб ёзади Bloomberg. Янгилик аллақачон Осиё яримўтказгич ишлаб чиқарувчиларининг акцияларига таъсир кўрсатди.
«Байден маъмурияти сунъий интеллект иловалари учун график чиплар ва илғор чиплар ишлаб чиқариш ускуналарини Хитой фирмаларига сотиш устидан назоратни кучайтиришга интилмоқда», — деб тушунтирди агентлик манбалари.
Август ойида АҚШ президенти Жо Байден ҳам Хитойнинг технология саноатига, жумладан яримўтказгич ва микроэлектроникани ривожлантириш, квант технологияси ва сунъий интеллектга АҚШ сармоясини чекловчи фармонни имзолади. Иқтисодчилар бу қарама-қаршиликни «чип уруши» деб аташади.
