Бирлашган Араб Амирликларининг Дубай шаҳридаги халқаро аэропортда Uzbekistаn Airways авиакомпаниясининг Тошкентга учишга ҳозирлик кўраётган самолётида икки йўловчи ўртасида жанжал содир бўлди.
Транспорт ва туризм объектларида хавфсизлик департаментининг хабар беришича, 16 апрель куни йўловчилар HY334-сонли рейсга чиқиб ўтирган, эшиклар ёпилган ва трап олиб ташланган. Бироқ ноқулай об-ҳаво туфайли парвоз кечиктирилган. Шу вақтда йўловчилардан бири — 45 ёшли Ўзбекистон фуқароси (аёл) жанжал чиқарган.
У экипаж аъзоларининг бир неча бор тинчлантириши ва тушунтиришига қарамай, самолётдаги 200 нафар йўловчидан иборат жамоат жойида уятли сўзлар билан баланд товушда сўкинган. Шу тариқа, жамиятда юриш-туриш қоидаларини қасддан менсимай, шовқин кўтарган ва самолётдан чиқишни талаб қилган, дейилади хабарда.
Таъкидланишича, аёл уни тинчлантиришга ҳаракат қилган ҳамюрти — 42 ёшли йўловчи аёл билан ҳам жанжаллашиб, безорилик ҳаракатларини содир этган. Шундан сўнг фавқулодда трап техникалари жалб қилинган, самолёт эшиклари очилган ва Дубай аэропортининг ҳуқуқни муҳофаза қилувчи орган ходимлари жанжаллашган фуқароларни самолётдан тушириб қолдирган.
Ҳолат оқибатида рейс яна кечиктирилган. Бошқа авиарейсларнинг ҳам белгиланган жадвал вақтлари ўзгартирилган. Оқибатда Uzbekistan Airways`га 5037 доллар моддий зарар келиб чиққан, дейилади хабарда.
Ҳолат юзасидан департамент ходимлари томонидан терговга қадар текширув ишлари олиб борилиб, безорилик ҳаракатини содир қилган шахслардан моддий зарар тўлиқ ундирилган. Уларга нисбатан маъмурий жавобгарлик масаласини ҳал қилиш учун ҳужжатлар судга юборилган.
