Халқ депутатлари Тошкент шаҳар Кенгаши 1 апрелдан 31 декабрга қадар ташқи реклама объектларини жойлаштириш, ўрнатиш, ўзгартириш ва паспортларининг берилишига мораторийни кўзда тутган 27 мартдаги қарорига ўзгартиришлар киритди. Ҳужжатлар ҳали жамоатчиликка эълон қилинмаган («Газета.uz»да нусхаси бор).
Тақиқ ташқи реклама объектларини (конструкцияларини) хатловдан ўтказиб, ягона электрон реестрни шакллантириш мақсадида жорий этилган, дея таъкидланган эди пойтахт ҳокимлиги.
Кенгашнинг 4 июндаги қарори билан аввалги қарорга ўзгартиришлар киритилди, унинг иккинчи банди қуйидаги таҳрирда баён этилган:
«Тошкент шаҳрида ўрнатилган ташқи реклама объектларини (конструкцияларини) хатловдан ўтказиб, ягона электрон реестрни шакллантириш мақсадида 2021 йил 1 апрелдан 2021 йил 31 декабрига қадар ташқи реклама соҳасида барча тадбиркорлик субъектларига тенг шароитларни яратиб бериш ҳамда бу соҳада коррупция ҳолатларининг олдини олиш ва тадбиркорлар билан шартномалар тузиш тизимини замонавий ахборот-коммуникация технологиялари ёрдамида рақамлаштиришга ўтказиш чора-тадбирлари кўрилсин».
Олдинроқ хабар берилганидек, 8 апрелдан буён пойтахтда реклама конструкцияларини оммавий демонтаж қилиш ишлари олиб борилмоқда. Ташқи реклама эгалари бўлган тадбиркорлар — баннерларнинг бузилишига «юқоридан келган топшириқ» сабаб бўлган ва демонтаж ишларини ноқонуний деб ҳисоблашади, чунки бу суд қарорисиз амалга оширилмоқда. Тадбиркорлар президентдан ёрдам сўраб, ўзларига тегишли бўлган реклама объектларига мурожаатларини жойлаштиришган эди.
Монополияга қарши курашиш қўмитаси реклама конструкцияларининг ярми талабларга жавоб бермаслигини маълум қилган. Қўмита барча томонларни қонун талабларига риоя қилишга чақирган.
Бизнес-омбудсман пойтахт халқ депутатлари кенгашининг бу тўғрисидаги қарорининг лойиҳаси адлия органларида ҳуқуқий экспертизадан ўтказилмаганлигини аниқлаган. Шу сабабли Олий Мажлис Сенатидан Кенгашнинг юқоридаги қарорининг қонунийлигига баҳо бериш ҳамда ваколат доирасида уни қайта кўриб чиқилишида амалий ёрдам бериш сўралган эди.
4 июнь куни бизнес-омбудсман ва кенгаш аниқлик киритишига кўра, қарорда реклама конструкцияларини демонтаж қилиш бўйича талаб ёки топшириқлар белгиланмаган. Бироқ, шунга қарамасдан, апрель ойида «тадбиркорларга тегишли реклама конструкциялари айрим шахслар томонидан ушбу қарорнинг мазмун-моҳиятига зид равишда демонтаж қилинган», дейилган эди хабарда.
Тошкентда реклама баннерларини демонтаж қилиш ишлари одамлар хавфсизлигини таъминлаш талабларини бузган ҳолда давом этмоқда. 8 июнь куни Тошкентнинг Чилонзор туманида, Ғафур Ғулом номидаги боғнинг ёнидан ўтиб кетаётган Spark автомашинасига демонтаж пайтида катта металл конструкция қулаб тушган.
Пойтахт ҳокимлиги содир бўлаётган ҳодисалар тўғрисида ҳалигача расмий баёнот бермади.
