Ўзбекистонда давлат компаниялари учун валюта операцияларини амалга ошириш тартиби қаттиқлаштирилди. Бу маълумотни 25 апрель куни бўлиб ўтган матбуот анжуманида Марказий банк раиси Мамаризо Нурмуратов тасдиқлади, деб хабар бермоқда «Газета.uz» мухбири.
Spot`нинг банк соҳасидаги суҳбатдошининг маълум қилишича, Вазирлар Маҳкамасининг давлат компаниялари бўйича қарори қабул қилинган, унга кўра, апрель ойидан бошлаб уларга валюта операцияларини фақат асосий ҳисобрақамига эга бўлган банклар орқали амалга оширишга рухсат берилган. Марказий банк тегишли ҳужжатни барча банкларга юборган.
«Бу савол янги эмас. Сентябрь ойида биз бу масалани кўтарган эдик, чунки бу нафақат валюта нуқтаи назаридан, балки давлат улуши 50 фоиздан ортиқ бўлган корхоналарнинг ташқи иқтисодий операциялари устидан тўғри валюта назорати олиб бориш нуқтаи назаридан ҳам зарур. Бу йўналишда шундай ҳужжат бор ва банклар унга биноан ишламоқда», — деди Марказий банк раиси Нурмуратов.
Эслатиб ўтамиз, сентябрь ойи ўрталарида Марказий банк банклар ва тадбиркорлик субъектлари учун валюта операциялари бўйича айрим чекловлар жорий этиш режасиниэълон қилган эди, бироқ жамоатчилик эътирозидан сўнг бу қарор бекор қилинган. Мамаризо Нурмуратов мазкур ҳужжат Марказий банкнинг Банк назорати қўмитаси қарори бўлгани, унга кўра банкларга мижозларни назорат қилиш ва санкция рискларини камайтириш чораларини кўриш топширилганини таъкидлаганди. Унинг сўзларига кўра, Ўзбекистонда мижозлар етарли даражада текширилмагани учун хорижий банклар тўловларни маъқулламаган.
У, шунингдек, иккиламчи банк ҳисобрақамлари орқали чет эл валютаси товарлар импорти доирасида ноқонуний олиб чиқиб кетилиши мумкинлиги ҳақидаги хавотирлар тўғрисида гапирган.
Ноябрь ойида регулятор юридик шахслар томонидан чет эл валютасини сотиб олиш устидан назоратни кучайтиришни таклиф қилган эди. Ўшанда валюта сотиб олишда зарур бўладиган ҳужжатлар сони ортиши, норезидентлардан миллий валютадаги маблағларнинг келиб чиқиши қонунийлигини таъминлаш ва бошқалар талаб қилиниши режалаштирилган эди. Аммо бу лойиҳа қабул қилинмаган.
