Шавкат Мирзиёев 29 январь куни бўлиб ўтган йиғилишда жамоат транспортини жадал ривожлантириш бўйича топшириқлар берди, деб хабар қилди президент матбуот котиби Шерзод Асадов.
Давлат раҳбарининг айтишича, тирбандлик ҳаво сифатига салбий таъсир кўрсатади, чунки ҳаракатдаги автомобилга қараганда тирбандликда турганлари ҳавони кўпроқ ифлослантиради.
Энди автобуслар харид қилишда уларнинг йўловчи сиғимига кўпроқ эътибор қаратилади. Президент Тошкент метрополитени вагонлари сонини кўпайтириш чора-тадбирларини тезлаштириш бўйича ҳам топшириқ берди.
Бундан ташқари, «яшил энергетика»ни қўллаб-қувватлаш, экологик муаммоларнинг олдини олиш ва ҳаво ифлосланишининг зарарли оқибатларини камайтириш мақсадида аҳолини электромобилларга ўтишини рағбатлантириш тизими жорий этилади.
Эслатиб ўтамиз, 2023 йилда Россиянинг «Трансмашхолдинг» раҳбари Тошкент метрополитени 2023 йилда яна 56 та вагон ёки 14 та поезд таркиби қабул қилиб олиши кераклигини айтган эди. 2019−2021 йилларда 60 та вагон етказиб берилган.
Ўтган йилнинг октябрь ойида пойтахт метрополитени йил охиригача 56 дона замонавий метро вагонларини харид қилиш режалаштирилаётганини маълум қилган эди. 2024 йилда қўшимча 104 та метро вагони харид қилиш режалаштирилган.
Йиғилишда Шавкат Мирзиёев бош вазир ўринбосари Ачилбай Раматов ва бошқа масъул раҳбарларга Тошкент шаҳридаги тирбандлик муаммосини ҳал этиш бўйича таклифлар тайёрлашни буюрди. «Барча раҳбарлар „Шаҳар — пиёдалар учун“ шиорини ўзининг асосий тамойилига айлантириши керак. Бунда, жамоат транспортига ҳар томонлама устунлик берилиши, автомобиллар эса ҳашаматга айланиши керак», — деди у.
Президент, шунингдек, бош вазирга 2025 йилдан бошлаб Аи-80 бензинидан воз кечиш масаласини узил-кесил ҳал қилиш бўйича топшириқ берди. Бундан ташқари, оғир юк машиналари, 10 йилдан ошган автомобиллар ҳамда «Евро-4» стандартидан паст ёнилғидан фойдаланиш оқибатида атроф-муҳитга етказиладиган зарарни камайтириш механизмларини ишлаб чиқиш вазифаси қўйилди.
