Шавкат Мирзиёев 16 январь куни бўлиб ўтган йиғилишда Иқтисодиёт ва молия вазирлиги ҳузуридаги Давлат молиявий назорати инспекцияси (собиқ КРУ) Бош прокуратура ҳузуридаги Иқтисодий жиноятларга қарши курашиш департаменти тузилмасига ўтказилишига муносабат билдирди.
Давлат раҳбари фақат камчилик аниқлайдиган, профилактика билан умуман шуғулланмайдиган идорага айланиб қолган инспекция фаолиятини «мутлақо қониқарсиз» деб атади.
«КРУ ҳар йили юзлаб давлат боғчаларини текшириб, „дежурний“ камчиликлар сифатида, албатта, озиқ-овқатдан камчилик топади. Бу борада инспекция ўтган йили 259 та давлат боғчасидан 10 млрд сўмлик камчилик аниқлаган, ўзи у ерда 100 миллиард сўм. Лекин инспекция камчиликларни илдизи билан йўқ қилиш бўйича бирорта таклиф бермади. Тизимда коррупция улуши юқори», — дейди у.
Шавкат Мирзиёев Андижон давлат университетида ўтказилган текширувда КРУ ходимлари 129 млн сўмлик камчилик аниқлаганини, бироқ улардан кейин ҳисоб палатаси томонидан ўтказилган текширишда олийгоҳ мансабдори 39,3 млрд сўм маблағни талон-торож қилгани маълум бўлганини айтди.
Президент бюджет маблағларини тақсимлаш ҳам, уни назорат қилиш ҳам битта вазирликда бўлиши нотўғри эканини, шунинг учун 362 нафар ходимдан иборат инспекция Бош прокуратура ҳузуридаги Иқтисодий жиноятларга қарши курашиш департаментига (ташкилотга тергов юритиш ваколати берилди) ўтказилишини таъкидлади.
2020 йилнинг ноябрида собиқ молия вазири Тимур Ишметов давлат молиявий назорати тизимида манфаатлар тўқнашуви мавжудлигини тан олганди. Унинг сўзларига кўра, молиявий назорат бирор вазирлик ичида эмас, ягона кучли бир тизим бўлиши керак, бирор вазирлик ҳам, бирор ҳокимият ҳам ундан устун бўлмаслиги керак.
2021 йилнинг апрель ойида бош прокурор Ниғматилла Йўлдошев вазирлик ва идоралар бўйсинувидаги текширувчи органларнинг мустақиллигини шубҳа остига олганди. Унинг сўзларига кўра, Энергетика вазирлиги қошидаги инспекция икки йил ичида ўз ташаббуси билан бирор марта ҳам текширув ўтказмаган, бир сўмлик ҳам зарарни аниқламаган. Ваҳоланки, ҳуқуқни муҳофаза қилиш идоралари икки йил давомида 300 млрд сўмлик зарарларни аниқлаган.
