14 декабрь куни ижтимоий тармоқларда Тошкент шаҳрининг Янгиҳаёт туманидаги кўп қаватли уйда электр токи ўчгани сабабли ичида ёш қиз бўлган лифт тормози ишламай, пастга қулагани ҳақида хабарлар тарқалди.
Туман ҳокимлигининг маълум қилишича, айтилаётган воқеа «Янги Дархон» маҳалласидаги 18-уйда содир бўлган, аммо лифт қуламаган. Ҳокимлик электр таъминоти узилгач, лифтда генератор ишлагани ва қиз пастки қаватга хавфсиз тушганини билдирди.
Маҳалла бошқарув компанияси директори Саидмурод Жўраевнинг сўзларига кўра, соат 14:00 атрофида электр энергияси ўчгани сабабли лифт 4-қаватда тўхтаб қолган, вояга етмаган қиз бундан қўрқиб кетган.
«Махсус генераторларимиз 1 дақиқадан сўнг ишга тушган. Лифт ичида қолган фуқаро 2 дақиқада ундан чиққан. Бошқа ҳеч қандай ҳолат бўлмаган. Ҳозирда лифт соз ҳолатда ишлаяпти», — деди у.
Ҳокимлик қиз ва унинг оиласи билан суҳбатлашилгани ва қизнинг аҳволи яхшилигини маълум қилди.
Лифт билан боғлиқ кўнгилсизликлар
Аввалроқ мазкур туманнинг худди шу маҳалласидаги кўп қаватли уйларнинг бирида пастга тушаётган лифт носозлик сабабли тезлашиб, биринчи қаватга етганда тормоз тизими ишлаб, тўхтаганди. 11 киши жароҳат олган, улардан 3 нафари шифохонага ётқизилган.
Июль ойида Тошкентнинг Яшнобод туманидаги янги бино лифтидан йўқолган аёлнинг жасади топилган. Кейинчалик Саноат хавфсизлиги давлат қўмитаси лифт электр таъминотидаги узилишдан кейин тўхтаб қолганини, Бош прокуратура эса бу лифт носоз бўлганини маълум қилган.
Шунингдек, октябрь ойида Тошкентнинг Мирзо Улуғбек туманидаги кўп қаватли уйда ичида одамлари бўлган лифт тушиб кетган ва 4-қаватга етгандагина тормоз тизими ишга тушган. Ҳокимлик уй давлат қабулидан ўтмаса ҳам, уч йил олдин топширилганини маълум қилган. Қурувчи қабулдан ўтганини айтиб, бошқарув компаниясини айблаган.
Август ойида бўлиб ўтган Сенат ялпи мажлисида мамлакатда аниқланган камчиликлар бартараф этилмаган 400 га яқин лифтдан фойдаланиб келинаётгани маълум қилинган.
Ушбу воқеалар фонида Ўзбекистонда 1 декабргача барча кўп квартирали уйлардаги мавжуд лифтларни хатловдан ўтказиш ва уларни интернетга имтиёзли нархларда улаш таклиф этилганди.
