Тошкентнинг Яшнобод туманидаги янги кўп қаватли уйлардан бирида 32 ёшли Ольга Леонтьеванинг жасади топилди. Бу ҳақда UzAlert қидирув-қутқарув отряди хабар берди.
Почтачи аёл 24 июль куни манзилларга хатларни тарқатгандан сўнг уйига қайтмаган. 26 июль куни UzAlert унинг йўқолганини эълон қилган.
«Видеокамералар Ольга янги бинолардан лифтга кираётганини қайд этган. Маълум бўлишича, лифт энг юқори қаватда қолиб кетган. Бу уйларда кўп одам яшамаслиги сабабли лифт носозлиги бўйича ҳеч ким мурожаат қилмаган ва Ольга ичкарида қолиб кетган. Бугун тунда у топилди», — дея хабар берди UzAlert фаоллари.
Хабарларга кўра, Леонтьевадан 6 ёшли бола етим қолди.
Ўзбекистон Бош прокуратураси аёлнинг ўлими ҳолатлари ва сабабларини ўрганаётганини маълум қилди.
Фавқулодда вазиятлар вазирлиги матбуот хизмати «Газета.uz»га уларга ушбу ҳодиса ҳақида хабар берилмаганини билдирди. Таъкидланишича, кўплаб лифтларда мобил алоқа узилиб қолган, шунинг учун бу вақтда ҳеч кимга қўнғироқ қила олмай қолиш мумкин.
