Тошкентдаги янги қурилган кўп қаватли уйлардан бирида 32 ёшли аёлнинг жасади топилган лифт бир неча кун давомида носоз ҳолатда турган. Ушбу лифт тез-тез ишдан чиқиб турган, дея маълум қилди Ўзбекистон Бош прокуратураси лифтни ўрганиш натижалари ва муқимлардан олинган маълумотлар асосида.
Тошкентнинг Мирзо Улуғбек тумани Паркент кўчасида жойлашган кўп қаватли уй лифтида 27 июль куни аёл кишининг жасади топилган эди. У 24 июль куни соат тахминан 14:50 ларда кўп қаватли уйнинг лифтига кириб, қайта чиқмаган. 26 июль куни марҳуманинг яқин қариндошлари томонидан ички ишлар идорасига бедарак йўқолгани юзасидан хабар берилган.
Текшириш давомида ушбу лифт бир неча кундан буён ишламаётгани, олдин ҳам ишламай қолиши ҳолатлари кўп маротаба бўлгани ҳақида муқимлар томонидан тушунтиришлар берилган. Шифокорларнинг дастлабки тиббий маълумотномасига кўра, марҳуманинг ўлимига юракнинг ишемик касалиги, ўткир юрак, қон-томир ва нафас етишмовчилиги сабаб деб кўрсатилган.
Саноат хавфсизлиги давлат қўмитаси лифт электр таъминотидаги узилишдан кейин тўхтаб қолганини маълум қилди. Қўмита дастлабки босқичда лифтнинг хавфсизлик мосламалари ҳолатини кўздан кечирган ва унинг иш ҳолатида эканини қайд этган, дейилади хабарда.
Қўмита маълумотларига кўра, уй 2020 йилда Lotus Gaz Invest (2005 йилда рўйхатдан ўтган, Real House брендига эгалик қилади) томонидан қурилган. Лифтнинг ўзи эса 2021 йилда Хитойнинг Aoyama Elevator Global компанияси томонидан ишлаб чиқарилган, юк кўтариш қуввати 630 кг. Лифт Arena Avto Trans Servis томонидан ўрнатилган ва 2022 йилда қурувчига топширган.
«Қурилиш ташкилоти ва уй-жой ширкатига лифтни белгиланган тартибда рўйхатдан ўтказиш учун инспекцияга мурожаат қилмаган, [лифт] ишга туширилмаган», — дейилади хабарда.
Ҳудудий электр тармоқлари корхонаси матбуот котиби Фахриддин Нуралиев «Газета.uz»га берган интервьюсида ўша кунларда уйда электр таъминотида узилишлар бўлмаганини билдирди.
«Буни диспетчерлик хизматининг фавқулодда ўчирилишлар тўғрисидаги қайдлари тасдиқлайди, — деди у журнални кўрсатиб. — Ҳодисага лифтнинг носозлиги сабаб бўлган. Буни уйда яшовчилар ҳам тасдиқлашди».
