Соғлиқни сақлаш вазири Ажар Гиният Қозоғистонда 21 ёшгача бўлган шахсларга энергетик ичимликлар сотиш тақиқланиши мумкинлигини маълум қилди. Бу ҳақда Tengrinews.kz хабар қилди.
«Бугун «Халқ саломатлиги тўғрисида»ги қонун лойиҳаси доирасида парламент депутатлар ташаббуси билан 21 ёшга тўлмаган шахсларга энергетик ичимликлар сотишни тақиқлаш тўғрисидаги нормани кўриб чиқмоқда», — деди Гиният ҳукумат брифингида.
Унинг таъкидлашича, Соғлиқни сақлаш вазирлиги қонунни қўллаб-қувватлаган.
«Бу ёшлар ва болаларнинг энергетик ичимликлар истеъмол қилиб, ўз соғлиғига зарар етказаётгани учун қилинмоқда. Бу меъёр ҳалигача муҳокама қилинмоқда, ҳали қабул қилинмаган. Яқин кунларда ушбу қонун лойиҳаси Сенатга юборилишини кутмоқдамиз», — дейди вазир.
Қозоғистонда энергетик ичимликларни истеъмол қилиш тақиқланмаган, аммо 18 ёшгача бўлган болалар учун «тавсия этилмайди».
