Татаристонда ўзбекистонлик талаба 5-қаватдан йиқилиб, ҳалок бўлди
Татаристоннинг Набережний Челни шаҳридаги қурилиш майдончасида ўзбекистонлик талаба бешинчи қаватдан йиқилиб, ҳалок бўлди. Фожиа 21 май куни эрталаб соат 10:00 ларда 33-микрорайондаги қурилиш майдонида юз берган. Маълум қилинишича, вафот этган йигит — Ўзбекистондан ўқишга келган 21 ёшли Челни университетининг талабаси. Йигит бир кун олдин қурилиш компаниясида вақтинча ишчи сифатида ишга жойлашган. У икки кун давомида стажировкадан ўтиши керак бўлган.
Шаҳар прокурорининг биринчи ўринбосари Челнов Айдар Галиев воқеа жойига етиб борган. Ҳозирда фожианинг сабаблари аниқланмоқда. Жиноят ишини қўзғатиш масаласи ҳал қилинмоқда.
4 ойда Ўзбекистонга 156 та электромобиль олиб кирилди. Бу 2020 йилги жами кўрсаткичдан ҳам кўп
Январь-апрель ойларида Ўзбекистонга 156 та электромобиль импорт қилинди — бу 2020 йилги жами кўрсаткичдан ҳам кўпроқ ва 2019 йилга қараганда тўрт бараварга ортган.
Электромобилларнинг кўп қисми Хитойдан — 119 та олиб келинган. Кейинги ўринлардан Туркия (24 та), Жанубий Корея ва АҚШ (4 тадан), Германия (3 та), Литва ва Испания (1 тадан) жой олган.
Андижон шаҳар прокурори истеъфога чиқди
Андижон шаҳар прокурори Қурбонали Асқаров ишдан бўшаш ҳақида ариза ёзди. Бош прокуратура уни ишдан кетишини шаҳар кенгаши сессиясидаги воқеалар билан боғлиқ эмаслигини айтмоқда. Аввалроқ, халқ депутатлари Андижон шаҳар кенгаши сессиясида депутатлар тинтув қилиниб, телефонлари олиб қўйилганди, қолаверса, шу куни депутат Шуҳратбек Каримов дахлсизлик ҳуқуқидан ҳам маҳрум этилган эди.
Порадан бош тортган ИИБ ходимига 15 млн сўм мукофот берилди
Пора тариқасида таклиф этилган 2 минг АҚШ долларини олмаган Самарқанд ИИО Фаолиятни мувофиқлаштириш бўлими ходими, капитан У.Саримовга 15 млн сўм миқдорида пул мукофоти берилди. Унинг ота-онасига эса ташаккурнома ва қимматбаҳо совғалар топширилди.
Қибрайдаги 21 та маҳалла Тошкент шаҳри таркибига ўтказилади
Тошкент шаҳри ҳудудини Тошкент вилояти Қибрай туманидаги 21 та маҳаллани пойтахтнинг Яшнобод ва Мирзо Улуғбек туманлари таркибига ўтказиш орқали кенгайтириш режалаштирилмоқда.
«Рейдерлик йўли билан тортиб олишди». Уч қаҳрамон бозоридаги мулкдорлар дўконлари ноқонуний олиб қўйилгани ҳақида
Уч қаҳрамон бозоридаги 100 га яқин мулкдолардан 2009 йилда сотиб олган дўконлари тушунтиришларсиз олиб қўйилаётгани айтилмоқда. Тадбиркорлар буни «рейдерлик йўли билан тортиб олиш» деб баҳоламоқда. «Газета.uz» мухбири бозор маъмурияти ва ернинг асл эгаси ҳисобланган қўшма корхона мутасаддиси билан ҳам суҳбатлашди — томонлар фикри.
Ўзбекистон тарихида илк бор 4 нафар таэквандочи Олимпиада йўлланмасини қўлга киритди
Ўзбекистонлик таэквондочи Светлана Осипова +67 кг вазн тоифасида Олимпиада лицензиясини қўлга киритди. Шу тариқа Ўзбекистон терма жамоаси тарихда илк бор таэквондо бўйича Олимпия ўйинларига 4 та йўлланмани қўлга киритди.
Токио-2020 Олимпия ўйинларида Ўзбекистон таэквондо терма жамоаси номидан Улуғбек Рашитов (-68 кг), Никита Рафалович (-82 кг), Нигора Турсунқулова (-67 кг) ҳамда Светлана Осипова (+67 кг) иштирок этади.
Тошкентдаги учта йўл ўтказгич ва йўллар қурилиш қиймати 49 млн долларга кўтарилди
Тошкентнинг Яккасарой ва Сергели туманларини боғлайдиган олти қаторли автойўл ва учта йўл ўтказгич қурилиши қиймати 280 млрд сўмдан 518,3 млдр сўмгача оширилди. Қурилиш ишлари Grand Road Tashkent томонидан олиб борилади. Ҳукумат лойиҳани тендерсиз ўтказишга рухсат берди.
