Тошкентнинг Сергели туманидаги Чўпонота, Кичик автомобиль ҳалқа йўли, Тошкент автомобиль ҳалқа йўли ва Қипчоқ кўчалари орасида жойлашган олти қаторли автомагистрал ва учта йўл ўтказгични қуриш лойиҳаси қиймати оширилди. Бунга давлат харидлари портали маълумотлари гувоҳлик бермоқда. Лойиҳа Grand Road Tashkent қўшма корхонаси томонидан амалга оширилмоқда.
Портал маълумотларига кўра, пойтахт ҳокимлиги ҳузуридаги «Ягона буюртмачи хизмати» инжиниринг компанияси Grand Road Tashkent билан 2020 йил 6 июлда шартнома имзолаган. Кейин иш қиймати тахминий равишда 280,9 миллиард сўмга баҳоланди (Марказий банкнинг ўша кундаги курси бўйича 27,6 миллион доллар — бир доллар учун 10 173,3 сўм). Шартномада ушбу миқдор лойиҳа-смета ҳужжатлари доирасида аниқ бажарилиши ва амалга оширилган ишларни ҳисобга олган ҳолда аниқланиши кераклиги қайд этилган. Ишни Ўзбекистон Молия вазирлиги ссудаси ҳисобига молиялаштириш режалаштирилган эди.
2020 йил 25 июнда имзоланган Вазирлар Маҳкамаси фармойиши билан (313-ф-сон) объектни қисқа вақт ичида лойиҳалаштириш, қуриш ва ишга тушириш учун, истисно тариқасида, буюртмачи сифатида «Ягона буюртмачи хизмати», бош лойиҳалаштирувчи сифатида — Allegro Develop Plast, бош пудратчи сифатида эса — Grand Road Tashkent танлаб олинди. Ҳужжат билан лойиҳага Туркиянинг Kalyon компаниясини ҳам жалб қилишга рухсат берилди.
Фармойиш билан, шунингдек, қурилиш-монтаж ишларини 2020 йил 31 декабригача лойиҳа-смета ҳужжатларини ишлаб чиқиш билан бир вақтда амалга оширишга имкон берди. Худди шу ҳужжатда лойиҳани танловсиз амалга оширишга ҳам рухсат берилди.
2021 йил 19 майда буюртмачи ва Grand Road Tashkent компанияси ўртасида қўшимча келишув имзоланди, унда иш қиймати 518,3 миллиард сўмгача (Марказий банкнинг 21 майдаги курси бўйича 49 миллион доллар) оширилди. Ушбу миқдор қурилиш ҳудудидан коммуникацияларни олиб ташлаш бўйича 51,8 миллиард сўмлик харажатларни ҳам ўз ичига олади.
2020 йилда Молия вазирлигининг кредит маблағлари ҳисобидан 164,3 млрд сўм молиялаштирилган эди. Келгусида ушбу лойиҳани Тошкент ҳокимлиги (15 миллиард сўм) маблағлари ва 2021 йилнинг биринчи чорагида республика бюджетининг прогнозли даромадларининг ортиқча бажарилиши ҳисобидан молиялаштириш режалаштирилган. Лойиҳани жорий йилда якунлаш мўлжалланмоқда.
«Газета.uz» учта йўл ўтказгич ва йўл қурилиши ҳақида батафсил маълумот бериб, уларнинг жойлашуви хариталарини ҳам тақдим этган эди. Биринчи йўл ўтказгични Кичик ҳалқа йўли ва Чупонота кўчалари кесишмасида қуриш режалаштирилган. Бундан ташқари, Сергели тумани йўналиши бўйича олти қаторли йўл ётқизилади, у ерда Тошкент ҳалқа йўли билан кесишган жойда иккинчи йўл ўтказгич қурилади. Учинчи йўл боғламаси йўлни Сергели туманидаги Қипчоқ кўчаси билан боғлайди.
2020 йил сентябрида тақдим этилган лойиҳа. Ўзгарган бўлиши мумкин. Фото: Яккасарой тммани ҳокимияти.
Сергели туманини Тошкент маркази билан боғлайдиган, узунлиги 5,6 км бўлган янги йўл қуриш лойиҳаси ўтган йилнинг июнь ойи бошида Ўзбекистон президентига тақдим қилинган эди.
Сентябрь ойида Ўзбекистон томонидан лойиҳа менежери Тимур Самутдинов «Газета.uz»га Allegro Develop Plast лойиҳалаш институти Kalyon Trafik эскизларини Ўзбекистон стандартларига мослаштираётганини маълум қилди.
Кўприкларни қуриш бўйича лойиҳа менежери, қурилиш муҳандиси Текин Экернинг таъкидлашича, КАҲЙ ва Чўпонота кўчалари кесишмасидаги кўприк баландлиги 13 м бўлган 47 та тиргак устунига эга бўлиб, йўл ўтказгичнинг умумий узунлиги 597 м, қайрилишли эстакадалар билан биргаликда эса 950 м ни ташкил этади.
КТЯДР маълумотларига кўра, Grand Road Tashkent 2018 йил 20 ноябрь куни Тошкентнинг Учтепа туманида рўйхатдан ўтган. Aсосий фаолияти шоссе ва йўллар қуришдир.
Таъсисчилари сифатида Тошкент шаҳар ҳокимлигининг «Муниципал активларни бошқариш маркази» ДУК (37,9%), шунингдек, 2018 йил 18 октябрда Туркияда рўйхатдан ўтган Туркиянинг Grandway İnşaat Yatırım Anonim Şirketi (62,1%) кўрсатилган.
Grand Road Tashkent 2020 йилда Тошкент кўчаларида жорий ва капитал таъмирлаш бўйича бир қатор лойиҳаларни амалга ошириш тўғрисидаги маълумотларни эълон қилди.
