Siyosat
Toshkent shahri hokimi o‘rinbosari Faxriddin Davrukov ishdan olindi
Prezident o‘tkazgan yig‘ilishda Toshkent shahri hokimining turizm bo‘yicha o‘rinbosari Faxriddin Davrukov lavozimidan ozod etildi. Poytaxt hokimligi turizm masalasida tashabbus bilan chiqmayotgani tanqid qilindi. Bosh vazirga turizm bo‘yicha har bir hokim o‘rinbosari ishiga baho berish topshirildi.
Iqtisodiyot
Mayda oylik inflyatsiya 2017-yil dekabridan buyon yangi rekordni o‘rnatdi, bu kommunal tariflar oshishi fonida yuz berdi
May oyida O‘zbekistonda inflyatsiya 2,8 foizgacha tezlashdi, bu 2017-yil dekabridan beri eng yuqori ko‘rsatkichdir. Yillik narxlar o‘sishi 10,5% dan oshdi. Ko‘rsatkichga gaz (+29%), elektr (+67%) va ijara (+17,3%) tariflarining oshishi ta’sir qildi. Dori-darmonlar narxi o‘sishda davom etdi.
Prezidentning tadbirkorlar bilan muloqoti bu yil Qoraqalpog‘istonda bo‘lib o‘tadi
Prezident va tadbirkorlarning yillik muloqoti bu yil Qoraqalpog‘istonda bo‘lib o‘tadi. U yerda xalqaro biznes-forum ham o‘tkaziladi. Ochiq muloqotni tashkil etish bo‘yicha komissiya tuzildi. “Qoraqalpog‘istonda biznes yuriting” dasturi doirasida yirik brendlarni respublikaga jalb etish rejalashtirilmoqda.
Deputat hukumatdan gazsiz aholi uchun elektr bo‘yicha ijtimoiy normani oshirishni so‘radi
Qator hududlar aholisi gaz bilan ta’minlanmagan va qishda elektrdan isitish uchun foydalanishga majbur bo‘lmoqda, dedi deputat Doniyor G‘aniyev. U hukumatdan qishki davr uchun ijtimoiy normani (hozir oyiga 200 kVt/soat) oshirishni so‘radi. Bosh vazir o‘rinbosari Jamshid Qo‘chqorov masalani o‘rganishga va’da berdi.
CASCA+ transport yo‘lagi faoliyatini muvofiqlashtirish uchun konsorsium tuzilishi mumkin
O‘zbekiston va yana 5 ta davlat vakillari CASCA+ transport yo‘lagi bo‘ylab yuk tashishni rivojlantirish bo‘yicha yig‘ilish o‘tkazdi. Unda “O‘zbekiston temir yo‘llari” vakillari faoliyatni muvofiqlashtirish va tez buziluvchi yuklarni muzlatkichli konteynerlarda tashishni yo‘lga qo‘yish bo‘yicha konsorsium tuzishni taklif qildi.
O‘zbekistonning davlat budjeti daromadlari o‘sishida sekinlashuv davom etmoqda
O‘zbekiston davlat budjeti daromadlari birinchi chorakda 5,3 trln so‘mga oshib, 52,6 trln so‘mni tashkil etdi. Daromadlar o‘sishi 11,3 foizgacha sekinlashdi (2023-yil yanvar-mart oylarida o‘sish 12,8 foiz bo‘lgan).
Prezident temiryo‘l va aviachiptalarni safardan kamida olti oy oldin savdoga chiqarish bo‘yicha topshiriq berdi
Turizm masalalariga bag‘ishlangan yig‘ilishda prezident temiryo‘l va aviachiptalarni kamida olti oy oldin sotuvga chiqarishni topshirdi. Shuningdek, chet ellik ijrochilar konsertlarini o‘tkazishga qo‘yiladigan talablarni qayta ko‘rib chiqish va qo‘shni davlatlar bilan chegaradan o‘tish jarayonini osonlashtirish buyurildi.
Jamiyat
Hafta davomida havo isib boradi
Iyunning birinchi ish haftasida ob-havo O‘zbekiston bo‘yicha quruq bo‘lishi kutilmoqda. Faqat 4−5-iyun kunlari Farg‘ona vodiysi viloyatlarida qisqa muddatli yomg‘ir yog‘ishi mumkin. Harorat hafta boshida 32, keyinroq 35 darajagacha isiydi.
“Bitkoin, notkoin va kriptovalyutalar bilan muomala shar’an joiz emas” — Fatvo markazi
Musulmonlar idorasi Fatvo markazi Islom dinida bitkoin, notkoin va boshqa kriptovalyutalarda savdo-sotiq qilish shar’an joiz emasligini bildirdi. Ularda shariat tomonidan pulga qo‘yilgan talablar topilmaydi, deydi markaz. “Raqamli pul"larning hukmida o‘zgarish bo‘lmaguncha ular bilan savdo qilmaslik so‘raldi.
O‘tkir diareyadan qanday saqlanish mumkin? SSV tavsiyalari
SSV yozda aholi, ayniqsa, bolalar o‘rtasida avj oladigan o‘tkir diareya belgilarini sanab, qanday qilib kasallikning oldini olish mumkinligi bo‘yicha tavsiyalar berdi. Gigiyenaga rioya qilish, qaynatilgan suv ichish, shifokor maslahatisiz antibiotiklarni qo‘llamaslik shular jumlasidan. Batafsil.
IHTga turizm yo‘nalishi bo‘yicha raislik O‘zbekistonga o‘tkazildi
Islom hamkorlik tashkiloti (IHT)ning turizm yo‘nalishi bo‘yicha raisligi Ozarbayjondan O‘zbekistonga o‘tkazildi. Ta’kidlanishicha, mamlakat o‘z raisligi davomida IHT hududida “kelajak turizmi"ni shakllantirishga alohida e’tibor qaratadi.
O‘zbekistonda “Tibbiy xizmatlar mehmondo‘stligi” dasturi yo‘lga qo‘yiladi
O‘zbekiston shifoxonalarida o‘tgan yili 60 mingdan ziyod xorijlik davolangan. Prezident ko‘rsatkichni oshirish uchun “Tibbiy xizmatlar mehmondo‘stligi” dasturi boshlanishini e’lon qildi. Endi xususiy klinikalarning xalqaro standart olish xarajatlari qoplanadi, ularda davolangan chet elliklar uchun QQS qaytariladi.
Turizmni rivojlantirish bo‘yicha jamoatchilik kengashi tuziladi
Turizm sohasiga doir yig‘ilishda tadbirkorlar bir qator takliflar ilgari surdi. Soha bo‘yicha dual ta’lim, keksa xorijliklar uchun 6 oylik vizasiz rejim joriy qilish, milliy mehmonxona brendlarini yaratish — shular jumlasidan. Prezident turizmni rivojlantirish bo‘yicha jamoatchilik kengashi tuzishni taklif qildi.
Toshkentda sobiq MXX binosi yaqinidagi daraxtlar noqonuniy ko‘chirilgani yuzasidan jinoyat ishi qo‘zg‘atildi
Bosh prokuratura Muna Mug kompaniyasi Toshkentdagi sobiq MXX majmuasi hududidan 53 tup sog‘lom daraxtni noqonuniy ravishda ko‘chirib o‘tkazganini ma’lum qildi. Daraxtlarni ko‘chirishga ruxsat bergan kompaniya vakillari va mansabdor shaxslarga nisbatan jinoyat ishi qo‘zg‘atildi.
Jahon
Gruziya parlamenti spikeri “xorijiy agentlar” to‘g‘risidagi qonunni imzoladi
Gruziya parlamenti spikeri ommaviy noroziliklarga qaramay, prezident Salome Zurabishvili veto qo‘ygan “Xorijiy ta’sirning shaffofligi to‘g‘risida"gi bahsli qonunni imzoladi. Hujjat imzolangandan keyin darhol kuchga kiradi.
Qozog‘iston “Tolibon"ni terrorchilar ro‘yxatidan chiqardi
Qozog‘iston prezidenti Qosim-Jomart Toqayev mamlakat “zamonaviy Afg‘oniston bilan savdo-iqtisodiy hamkorlikni rivojlantirish muhimligi va bu rejim uzoq muddatli omil ekanini anglagan holda” “Tolibon"ni terrorchilar ro‘yxatidan chiqarganini aytdi.
Bizni o‘qiyotganingiz uchun rahmat!
