Aziz Botirovich Voitov O‘zbekiston qishloq xo‘jaligi vaziri lavozimidan ozod etildi. Bu haqda “Gazeta.uz”ga hukumatdagi manbasi xabar berdi. Bu haqda, shuningdek, “Yuksalish” umummilliy harakati ham xabar qildi.
Seshanba kuni sobiq vazir prezident Shavkat Mirziyoyev tashrif bilan bo‘lgan Qashqadaryo viloyatiga borgan.
U ushbu lavozimni 2022-yil avgust oyi oxirida egallagandi. 2020-yilning mart oyida esa o‘sha paytda bosh vazir o‘rinbosari, investitsiyalar va tashqi savdo vaziri bo‘lgan Sardor Umurzakovga birinchi o‘rinbosar bo‘lgan.
Umurzakov Prezident administratsiyasi rahbari lavozimidan ozod etilganidan so‘ng u bilan birga ishlagan ko‘plab rahbarlar o‘z lavozimlarini tark eta boshladi. Ular orasida Sunnatilla Bekenov, Furqat Raximov, Olimxon Rustamov, Oybek Hamrayev va boshqalar bor.
Avvalroq ijtimoiy tarmoqlarda qishloq xo‘jaligi vaziri lavozimiga 2016−2018-yillarda qishloq va suv xo‘jaligi vaziri bo‘lgan Toshkent viloyati hokimi Zoyir Mirzayev kelishi haqida xabarlar paydo bo‘ldi. Ammo hokimlik xabarlarni rad etdi va hokim o‘z ishini davom ettirayotganini bildirdi.
