28-sentabr kuni soat 02:43 da Toshkent shahrining Sergeli tumanidagi “Quruvchilar” dahasida — poytaxt aeroportidan uncha uzoq bo‘lmagan hududda joylashgan “Inter Logistics” MCHJga qarashli omborxonada kuchli portlash sodir bo‘ldi.
Portlashdan so‘ng kuchli yong‘in ro‘y berdi, u haligacha (ushbu yangilik e’lon qilingan paytgacha) to‘liq o‘chirilmagan. Portlash ovozi kilometrlab uzoqlikdagi hududlargacha eshitildi, tutun va olov yorug‘i boshqa joylardan ham ko‘rindi.
“Gazeta.uz” muxbiri Sabina Bakayevaning xabar berishicha, portlash to‘lqini ko‘p qavatli uylardagi o‘nlab xonadonlarning oynalarini sindirgan, uylar oldida ko‘plab tez yordam mashinalarini ko‘rish mumkin. Ko‘pgina aholi o‘z mashinalarida uxlashiga to‘g‘ri keldi. Ayrim mashinalarga esa shikast yetgan.
Voqea joyida ko‘plab huquq-tartibot idoralari xodimlari va maxsus xizmatlar bo‘lib turibdi.
“Gazeta.uz” muxbiri Respublika shoshilinch tibbiy yordam ilmiy markaziga yetib keldi, biroq barcha bemorlar shahar klinik shifoxonasiga yuborilayotgani aytildi.
Shahar klinik shifoxonasida bosh shifokor o‘rinbosari Ermuhammad Sotibaldiyevning aytishicha, jabrlanganlar soni aniqlanmoqda. Hozirgacha qancha odam qabul qilingani aytilmadi. Ko‘pgina bemorlarning yuzida tirnalishlar mavjud.
Omborxonada sodir bo‘lgan yong‘inni o‘chirishga Mudofaa vazirligi vertolyoti jalb etilgan. Voqea joyiga O‘zbekiston bosh vaziri Abdulla Aripov ham yetib kelgan. Ayni vaqtda yetkazilgan zarar va jabrlanganlar soni aniqlanmoqda.
Foto
Sabina Bakayeva suratlari
Mushtariy Oqboyeva suratlari
“Manba” Telegram kanali
“Gazeta.uz” muxbirlari voqea joyida bo‘lib, vaziyatni o‘rganmoqda.