Fevral oyining o‘rtalarigacha O‘zbekistonda qish o‘z o‘rnini saqlab qoladi, vaqti-vaqti bilan iliq va sovuq kunlar almashib turadi. Oyning oxiriga kelib tekisliklarga bahor keladi, deya xabar bermoqda O‘zgidromet.
Oy nisbatan iliq ob-havo bilan boshlanadi. Fevralning birinchi o‘n kunligida kechalari harorat 0…+5 daraja iliq, ba’zi joylarda -2 daraja sovuq atrofida bo‘ladi, kunduz kunlari harorat +6…+8° iliqdan +12…+14° iliqqacha o‘zgarib turadi.
5 fevralda shimolda, 6 fevralda O‘zbekistonning qolgan hududlarida asosan yomg‘ir ko‘rinishidagi yog‘ingarchilik bo‘ladi. Respublika bo‘yicha ba’zi joylarda birinchi o‘n kunlikning eng oxirida ham biroz yog‘ingarchilik bo‘lishi mumkin.
Keyinchalik Jahon prognostik markazlarining hisob-kitoblariga asoslangan holda, O‘zgidrometning dastlabki bahosiga ko‘ra, havo harorati kechalari 0…+5° iliqdan 0…-5 darajada sovuqqacha, shimolda esa −8…−13 gradus sovuqqacha o‘zgarib turadi. Kunduz kunlari +10…+15 daraja iliqdan +3…+8 gacha ilishi mumkin.
Hududlarning katta qismida yomg‘ir va qor ko‘rinishidagi yog‘ingarchilik me’yordan kam bo‘lishi kutilmoqda.
O‘zgidromet oldingi yillarda fevral oyida kuzatilgan ob-havo haroratini ham eslatib o‘tdi.
2021 yil fevral oyining o‘rtalariga kelib, havo harorati +23…+28 daraja iliq, janubda hatto +32 gradus iliq qiymatlariga yetdi. Oyning oxiriga kelib, respublika iqlimi uchun qattiq bo‘lgan sovuq keldi. Kechalari havo −10…−12 daraja sovuq, ba’zi joylarda -15 daraja sovuqgacha, shimolda −2…−22 darajada sovuq, Ustyurtda hatto bu ko‘rsatkich −23…−25 gradusgacha yetdi. Respublikaning eng janubiy viloyatlarida ham kechalari havo harorati −4…−7ga teng edi.
O‘zbekistonda so‘nggi yillardagi eng sovuq fevral oyi 2014 yilda kuzatilgan. O‘shanda o‘rtacha harorat me’yordan −5…−7 daraja past, oyning birinchi yarmida esa me’yordan umuman −12…−15 darajaga past bo‘lgan. Eng sovuq davrda havo harorati kechalari −14…−17 gradus sovuqqacha, kunduz kunlari esa −7…−10 gradus sovuqqacha pasaygan.
Eng issiq fevral oyi esa 2016 yilda kuzatilgan. Bunda eng issiq davrlarda havo harorati +23…+28 darajagacha ko‘tarildi. O‘shanda fevral oyi nafaqat issiq, balki eng quruq bo‘lgan. Qishning o‘sha so‘nggi oyida yog‘ingarchilik anomal kam miqdorda yoqqan, Toshkentda me’yordan atigi 3% ni tashkil etgan.
