Surxondaryoda ham kuchli yomg‘irlar sel kelishiga olib keldi. Bu haqda Favqulodda vaziyatlar vazirligi matbuot xizmati xabar berdi.
6 may kuni Surxondaryo viloyatining Sherobod va Qumqo‘rg‘on tumanlarida yoqqan kuchli yomg‘ir oqibatida hosil bo‘lgan sel oqimlari Sherobod tumanidagi «Qorabog‘» QFY va «Uchyog‘och», «Guliston», «G‘o‘rjak-2» MFYdagi 16 ta, Qumqo‘rg‘on tumani «Azlarsoy», «Bog‘aro» va «Elobod» MFYdagi 340 ta aholi xonadonlari va tomorqasiga kirgan.
Hozirda tabiiy ofat oqibatlari bartaraf etish ishlari olib borilmoqda.
Eslatib o‘tamiz, 6 may kuni Namangan viloyatida ham sel kelishi natijasida xonadonlarga suv kirgani va ayrim yo‘l uchastkalari zarar ko‘rgani haqida xabar berilgan edi.
Shuningdek, 6 may kunidan 7 may kuniga o‘tar kechasi Andijon viloyati Xonobod shahrida kuchli sel kelishi tufayli 700 ga yaqin xonadonlar zararlangan va Qirg‘iz ariq kanalining toshishi oqibatida bir oilaning 2 nafar voyaga yetmagan farzandlari selda oqib ketib, vafot etgan.
