O‘zbekiston bosh vaziri Abdulla Aripov dushanba kuni shaharning yangi saylangan xalq deputatlari shahar kengashi sessiyasida Toshkent hokimi Jahongir Ortiqxo‘jayevni «yetakchi rahbar va zamonaviy menejer» deb atadi, deya xabar berdi «Gazeta.uz» muxbiri.
Avvalroq amaldagi hokim Jahongir Ortiqxo‘jayev O‘zbekiston prezidenti Shavkat Mirziyoyevning taqdimnomasiga binoan poytaxt ma’muriyati rahbari lavozimiga qayta tasdiqlangani haqida xabar bergan edik.
Davlat rahbarining taqdimotini bosh vazir Abdulla Aripov o‘qib berdi. Kengashda vakillik qilgan barcha partiyalar uning nomzodini qo‘llab-quvvatladilar.
«Jahongir Ortiqxo‘jayev 1975 yilda tug‘ilgan. Oliy ma’lumotli, 1996 yilda Toshkent davlat iqtisodiyot universitetini tamomlagan. U hozirgi lavozimida 2018 yil dekabridan beri ishlaydi. Jahongir Ortiqxo‘jayev iqtisodiyot va qurilish sohasida yetarlicha tajriba to‘plagan, zamonaviy tafakkurga ega yetakchi kadrlardan», — dedi u.
Bevosita Jahongir Ortiqxo‘jayev rahbarligida Toshkentda Tashkent City majmuasi, prezident maktabi, Abdulla Qodiriy nomidagi ijod maktabi, matematik fanlari maktabi barpo etildi, Olmazor Business City va Yunusobod Business City markazlari, G‘alaba bog‘i, Adiblar xiyoboni barpo etilmoqda, deyiladi taqdimnomada.
Birgina 2019 yilning o‘zida 16590 xonadonli 371 ko‘p qavatli uy qurilib, foydalanishga topshirildi. 1 milliard 946 million dollar miqdoridagi to‘g‘ridan-to‘g‘ri xorijiy investitsiyalar o‘zlashtirildi, umumiy qiymati 420 million dollar bo‘lgan 151 loyiha amalga oshirildi. Poytaxt korxonalari tomonidan 247 million dollarlik mahsulot eksport qilindi — bu ko‘rsatkich 9,7 foizga oshirildi. Yil yakunlari bo‘yicha mahalliy byudjetga tushumlar 6,7 trln so‘mdan oshdi, byudjetning daromad qismi bo‘yicha reja 743 mlrd so‘mga oshirildi.
«O‘tgan davr mobaynida Jahongir Ortiqxo‘jayev o‘zini mamlakatdagi ijtimoiy-iqtisodiy islohotlarning maqsadlarini tushunadigan va aniq vazifalarni samarali bajarishga qodir bo‘lgan fidoyi va tashabbuskor rahbar sifatida namoyon etdi», — deya o‘qib eshittirdi bosh vazir Prezident administratsiyasi rahbari Zaynilobiddin Nizomiddinov tomonidan imzolangan taqdimnomadan.
Abdulla Aripov Jahongir Ortiqxo‘jayevni «zamonaviy fikrlaydigan, ishini zamonaviy darajada tashkil qila oladigan, kelajakni ko‘ra oladigan yetakchi rahbar va zamonaviy menejer» deb atadi.
«Uning rahbarligi ostida Toshkentning zamonaviy zamonaviy qiyofasi paydo bo‘ldi. Qisqa vaqt ichida yangi bino va inshootlar yuqori sifatda barpo etildi. Loyig‘ini berishimiz kerak. Chunki ilgari bino va inshootlar tez va shoshma-shosharlik bilan qurilar, keyin bir muncha vaqt o‘tgach [oxiriga yetkazib qo‘yish uchun] quruvchilarni yuborishga to‘g‘ri kelar edi. Jahongir Abidovich ishtirokida yoki boshchiligida qurilgan bino va inshootlarda esa foydalanishga topshirilgandan so‘ng, kamchiliklarni tekshirish yoki yo‘q qilishning hojati yo‘q. Chunki bu kishi ishni mukammal saviyaga olib chiqadi», — deya ta’kidladi hukumat rahbari.
Bosh vazir Toshkent hokimi tomonidan asos solingan kompaniyalar muvaffaqiyati to‘g‘risida bir nechta misollar keltirdi.
«Ozarbayjonga tashrifimiz chog‘ida eng zamonaviy mehmonxonaning turli xonalarida Jahongir Artyxxo‘jayev tomonidan asos solingan Artel kompaniyasining maishiy jihozlari borligiga guvoh bo‘ldik. Nafaqat Ozarbayjonda, balki Qozog‘istonda, Rossiyada ham… Prezident nomidan Afg‘onistonning Mozori Sharif shahriga tashrif buyurganimizda, u yerda barcha e’lonlar arab tilida yozilgan edi, men lotin alifbosidagi uchta reklama — Akfa, Artel va Crafers reklamalarini ko‘rdim. Jahongir Abidovich qaysi sohada bo‘lmasin, barchasini yuqori saviyada bajaradi», — dedi u.
Abdulla Aripov, shuningdek, prezidentning Toshkentni obodonlashtirish haqidagi topshirig‘iga ham to‘xtalib o‘tdi. Uning aytishicha, ishlab chiqarish korxonalarini poytaxtning chekkasiga ko‘chirish, shaharning o‘zida esa «aholiga yuqori daromad va maosh beradigan» xizmat ko‘rsatuvchi kompaniyalar sonini ko‘paytirish rejalashtirilgan.
«Jahongir Abidovich ushbu jarayonni amalga oshirish uchun to‘g‘ri yondashuvni tanladi. U shoshilmadi, yaxshi tavsiyalar beradigan sohadagi yaxshi mutaxassislarni taklif qildi. Masalan, Cushman & Wakefield va PricewaterhouseCoopers konsalting kompaniyalari. Prezidentning Toshkent [ob’ektlari]ga tashrifi chog‘ida ushbu masalalar bo‘yicha hisobot taqdim etildi, muhtaram prezident ushbu g‘oyalarni qo‘llab-quvvatladi», — dedi u.
Hukumat rahbarining ta’kidlashicha, prezident Toshkentni nafaqat Markaziy Osiyoda, balki mintaqadagi eng yirik markazlardan biriga aylantirish bo‘yicha takliflar bilan tanishgan va qo‘llab-quvvatlagan.
«Mana, ko‘chaning narigi tomonida Tashkent City, bundan ikki yil oldin prezident bu yerga kelib, loyihani boshlaganida hech kim ishonmagan. Dastlab, Jahongir Abidovich, u hali ham tadbirkor bo‘lib ishlayotgan paytda, Tashkent City qurilish direksiyasining boshlig‘i etib tayinlandi. Qurilishning birinchi bosqichi o‘z vaqtida va yuqori darajada yakunlandi. Sizning e’tiboringizni yangi yil arafasida o‘rnatilgan maxsus kameralar tomonidan Tashkent Cityga 900 mingdan ortiq kishi tashrif buyurganini qayd etilganiga qaratmoqchiman. Ya’ni, Jahongir Abidovichning mehnati natijasida odamlar bemalol ko‘chaga chiqishlari va ko‘chalarda sayr qilishlari uchun qulayliklar yaratilgan», — dedi bosh vazir.
