Ўзбекистонда 1 ноябрдан маҳаллий поезд чипта нархлари оширилди. «Ўзтемирйўловчи» компанияси сайтида чипталар нархлари ўзгарган ҳолда сотила бошланди. Ушбу маълумотни «Газета.uz» мухбири билан гаплашган компания сотув бўлими оператори тасдиқлади.
Қайд этилишича, маҳаллий йўналишлардаги йўловчи поездлари чипта нархларининг тариф қисми 44 фоизга, юқори тезликда ҳаракатланувчи «Афросиёб» электропоездлари чипталари тўлиқ нархи 60 фоизга оширилди.
Хусусан, «Афросиёб» электропоездлари чипталари:
Тошкент — Бухоро — Тошкент йўналишида:
- VIP 530 000 сўм;
- Бизнес 385 000 сўм;
- Эконом 280 000 сўм.
Тошкент — Қарши — Тошкент йўналишида
- VIP 455 000 сўм;
- Бизнес 325 000 сўм;
- Эконом 235 000 сўм.
Тошкент — Самарқанд — Тошкент йўналишида
- VIP 330 000 сўм;
- Бизнес 230 000 сўм;
- Эконом 170 000 сўм этиб белгиланди.
Мисол учун, Тошкент-Қарши йўналишида ҳаракатланувчи «Афросиёб» поездининг эконом класс билети учун чипта шу пайтга қадар 144 минг сўмдан сотилган бўлса, жорий этилган янги нархларга кўра, у 235 минг сўмдан сотилмоқда.
Худди шу йўналишда ҳаракатланувчи «Шарқ» поездининг эконом класс тоифасидаги (ўриндиқли) чипталари бугунгача 92 мингдан сотилган бўлса, энди унинг нархи 132 180 сўм этиб белгиланди.
Аввалроқ «Ўзтемирйўловчи» компанияси маҳаллий поездлар чипта нархлари 20 октябрдан кўтарилишини айтганди. Хусусан, йўловчи поездлари чипта нархларининг тариф қисми 50 фоизга, «Афросиёб» электропоездлари чипталари эса 100 фоизга оширилиши керак эди.
Бироқ ўша кунга келиб, темирйўл чипталари нархи ошмайдиган бўлган. «Ўзбекистон темирйўллари» АЖ матбуот котиби Алишер Болтабоев айни вақт ташкилот ставкаларни қайта кўриб чиқаётгани, жараёнда юқори тезликда ҳаракатланувчи поездларнинг қатнов нархлари 2 баробарга оширилмаслиги ҳам мумкинлигини билдирганди.
