Украинада салкам 18 ойдан бери давом этаётган уруш оқибатида ҳалок бўлган ҳамда яраланган Россия ва Украина ҳарбий хизматчиларининг умумий сони 500 минг кишига яқинлашди, дея ёзмоқда The New York Times нашри АҚШ расмийларига таяниб.
Қайд этилишича, Россия урушда 300 мингга яқин аскар йўқотган, жумладан, улардан 120 минг нафари ҳалок бўлган ва 180 минг нафари яраланган. Украина армиясида эса ҳалок бўлганлар 70 минг кишини, ярадорлар 120 минг ҳарбийни ташкил этгани айтилмоқда.
Шунингдек, айни пайтда Украина армиясида 500 мингга яқин, Россияникида эса 1 млн 330 минг аскар мавжуд, дея таъкидлайди газета.
Нашр манбаларининг огоҳлантиришича, ҳақиқий рақамларни айтиш мушкул, чунки «Москва ўлганлар ва ярадорлар сонини мунтазам равишда кам баҳолайди, Киев эса расмий рақамларни ошкор қилмайди».
АҚШ президенти маъмурияти Украинадаги уруш қурбонлари ҳақидаги ҳисоб-китобларни охирги марта 2022 йилнинг ноябрида эълон қилганди. Ўшанда Штаб бошлиқлари бирлашган қўмитаси раҳбари Марк Милли иккала томондан 100 мингдан ортиқ ҳарбий ҳалок бўлгани ва яраланганини айтган.
NYT манбаларининг айтишича, жанг майдонида қурбонлар сони Бахмут учун оғир жанглардан сўнг кескин ошган ва 3 ой олдин Украинанинг қарши ҳужуми бошланганидан бери ҳар икки томон ҳам «катта йўқотишларга» учраган.
Ўлганлар ва ярадорлар сонининг кўплиги ҳар икки томон сарфлаган ўқ-дорилар миқдорини акс эттиради, шунингдек, фронтда тез тиббий ёрдам кўрсатилмаганидан далолат беради, деб ёзади газета. Таъкидланишича, шиддатли ўққа тутиш туфайли ярадор аскарларнинг эвакуация қилиниши қийин кечмоқда, шифохоналар ва тез тиббий ёрдам пунктлари кўп ҳолларда гавжум бўлади.
АҚШ ҳисоб-китоблари сунъий йўлдошдан олинган суратлар, суҳбатларни тинглаш, ижтимоий тармоқлар ва ОАВ хабарлари ҳамда иккала ҳукуматнинг расмий маълумотларига асосланади. Бироқ маълумотлар ҳатто мамлакат ҳукумати ичида ҳам фарқ қилади, дея таъкидлайди NYT.
Шу йилнинг баҳорида Пентагоннинг тармоқларга сиздирилган ҳужжатларига кўра, Россиянинг урушдаги йўқотишлари 189,5 мингдан 223 минг нафаргача, жумладан, 43 мингга яқин ҳалок бўлган ҳарбийни ўз ичига олади. Украинанинг йўқотишлари эса февралда 124,5 мингдан 131 минггача, жумладан 17,5 минг нафар вафот этган ҳарбийни ташкил қилади.
