Foto: O‘zbekistonda 1990−2004-yillarda Navro‘z bayrami qanday nishonlangan?

Toshkent Fotosuratlar uyida 18-mart kuni O‘zbekiston Badiiy akademiyasi, “O‘zarxiv” agentligi, Kinofotofono hujjatlari milliy arxivi hamda O‘zbekiston milliy axborot agentligi (O‘zA) hamkorligida Navro‘zga bag‘ishlangan fotoko‘rgazma ochildi.

Foto: Madina A’zam / “Gazeta.uz”

Ko‘rgazma ochilishida so‘zga chiqqan “O‘zarxiv” agentligi direktori Ulug‘bek Yusupovning ta’kidlashicha, ushbu tadbirdan ko‘zlangan maqsad — Navro‘z tantanalari yillar davomida qanday o‘zgarganganini ko‘rsatishdir. Bunday ko‘rgazmalarni kelgusi yillarda ham tashkillashtirish rejalashtirilgan.

Agentlik rahbari tarixiy lavhalar kelajak avlodlarga ana shunday suratlar orqali yetib borishini ta’kidlab, fotosuratchilarni davlat arxivlarida o‘z shaxsiy fondlarini ochishga chaqirdi.

“Tarixni o‘rgangan, arxiv hujjatlarini tadqiq qilganimiz sari yangi fotohujjatlarni topamiz. Biz izlanishda davom etamiz. Bundan keyin ham fotosuratlarning ko‘lamini kengaytirib, bir emas, bir nechta zalda e’tiboringizga havola etamiz”, — deya ta’kidladi Ulug‘bek Yusupov.

Ko‘rgazma 28-martgacha davom etadi.

“Olam nurga to‘lsin sen bilan, Navro‘z” shiori ostida tashkil etilgan ko‘rgazmada Navro‘z bayramiga oid Kinofotofono hujjatlari milliy arxivida saqlanayotgan 1978−2004-yillarga oid, shuningdek, O‘zA taqdim etgan yangi davr lavhalari — 120 dan ortiq fotosurat namoyishga qo‘yilgan. Quyida “Olam nurga to‘lsin sen bilan, Navro‘z” ko‘rgazmasida namoyishga qo‘yilgan faqat 1990-yildan keyingi davrni aks ettiruvchi suratlarning bir qismi mushtariylar e’tiboriga havola etiladi.

1990-yil

Toshkent “Sharq guli” ishlab chiqarish badiiy birlashmasida Navro‘z bayramining tantanali ochilishi. Toshkent, 1990-yil

Respublika televideniyesi tomonidan tashkil etilgan va Navro‘z bayramiga bag‘ishlangan 24 soatlik marafon ishtirokchilari O‘zbekiston teatr arboblari uyushmasi qoshidagi “Tomosha” bolalar ansambli. Toshkent, 1990-yil, 19-mart

Navro‘z bayrami uchun samarqandlik oshpaz ustalar ikki metr uzunlikdagi Registon tortini tayyorladi. Toshkent, 1990-yil

1991-yil

Registon maydonida Navro‘z bayramiga bag‘ishlangan tantanalashtirilgan tomosha. Samarqand, 23.03.1991-yil

Shovot tumanidagi “Do‘stlik” mahallasi aholisi Navro‘z bayrami paytida sumalak pishirmoqda. Xorazm, 1991-yil

Xalqlar do‘stligi maydonida Navro‘z bayrami paytida sumalak tayyorlanmoqda. Toshkent, 1991-yil, 21-mart

Navro‘z bayrami chog‘ida Urganch shahrining Teatr maydonida musiqa va qo‘shiqlar yangramoqda. Xorazm viloyati, 1991-yil, 22-mart

Navro‘z bayramida Xorazm viloyatidan badiiy havaskorlik artistlari. Toshkent, 1991-yil, 22-mart

1993-yil

Mustaqillik maydonida bolalar uchun tashkil etilgan Navro‘z bayrami chog‘ida. Toshkent, 1993-yil, 22-mart

Navro‘z bayrami munosabati bilan xalq sozandalarining chiqishi. Toshkent, 1993-yil, 22-mart

Navro‘z bayramida milliy raqslar. Toshkent, 1993-yil, 22-mart

Mustaqillik maydonidagi Navro‘z tantanalari chog‘ida. Toshkent, 1993-yil, 22-mart

Termiz tumanidagi “Do‘stlik” kolxozi ayollari Navro‘z bayrami uchun sumalak tayyorlamoqda. Surxondaryo viloyati, 1993-yil, 22-mart

1994-yil

Jarqo‘rg‘on tumanidagi Norali Boymurodov xo‘jaligida Navro‘z bayramiga sumalak tayyorlanmoqda. Surxondaryo viloyati, 1994-yil, 16-mart

Navro‘z bayramida. Toshkent, 1994-yil, 21-mart

Alisher Navoiy bog‘idagi Navro‘z bayramida raqqosalarning chiqishi. Toshkent, 1994-yil, 21-mart

Alisher Navoiy bog‘ida Navro‘z bayrami qatnashchilari. Toshkent, 1994-yil, 21-mart

Guliston shahrida Navro‘z tantanalari. Sirdaryo viloyati, 1994-yil, 22-mart

1995−1997-yillar

Nukusda Navro‘z bayrami. Nukus, 1995-yil

Navro‘z bayramida. Farg‘ona, 1997-yil, 21-mart

Nishon tumanidagi Tollimarjon yaylovlarida Navro‘z munosabati bilan tashkil etilgan ko‘pkari lavhalari. Qashqadaryo viloyati, 1997-yil, 20-mart

1999−2004-yillar

Yuqori Chirchiq tumanidagi “Do‘stlik” stadionidagi Navro‘z bayramida karnaychilarning chiqishlari

Yunusobod tumani “Beruniy” mahallasida Navro‘z bayrami. Toshkent, 2004-yil

“Gazeta.uz” ikki yil oldin Navro‘z bayramining 1970−1990-yillarda nishonlanishiga oid Kinofotofono hujjatlari milliy arxividagi fotosuratlarni taqdim etgandi.