Фото: Ўзбекистонда 1990−2004 йилларда Наврўз байрами қандай нишонланган?

Тошкент Фотосуратлар уйида 18 март куни Ўзбекистон Бадиий академияси, «Ўзархив» агентлиги, Кинофотофоно ҳужжатлари миллий архиви ҳамда Ўзбекистон миллий ахборот агентлиги (ЎзА) ҳамкорлигида Наврўзга бағишланган фотокўргазма очилди.

Фото: Мадина Аъзам / «Газета.uz»

Кўргазма очилишида сўзга чиққан «Ўзархив» агентлиги директори Улуғбек Юсуповнинг таъкидлашича, ушбу тадбирдан кўзланган мақсад — Наврўз тантаналари йиллар давомида қандай ўзгарганганини кўрсатишдир. Бундай кўргазмаларни келгуси йилларда ҳам ташкиллаштириш режалаштирилган.

Агентлик раҳбари тарихий лавҳалар келажак авлодларга ана шундай суратлар орқали етиб боришини таъкидлаб, фотосуратчиларни давлат архивларида ўз шахсий фондларини очишга чақирди.

«Тарихни ўрганган, архив ҳужжатларини тадқиқ қилганимиз сари янги фотоҳужжатларни топамиз. Биз изланишда давом этамиз. Бундан кейин ҳам фотосуратларнинг кўламини кенгайтириб, бир эмас, бир нечта залда эътиборингизга ҳавола этамиз», — дея таъкидлади Улуғбек Юсупов.

Кўргазма 28 мартгача давом этади.

«Олам нурга тўлсин сен билан, Наврўз» шиори остида ташкил этилган кўргазмада Наврўз байрамига оид Кинофотофоно ҳужжатлари миллий архивида сақланаётган 1978−2004 йилларга оид, шунингдек, ЎзА тақдим этган янги давр лавҳалари — 120 дан ортиқ фотосурат намойишга қўйилган. Қуйида «Олам нурга тўлсин сен билан, Наврўз» кўргазмасида намойишга қўйилган фақат 1990 йилдан кейинги даврни акс эттирувчи суратларнинг бир қисми муштарийлар эътиборига ҳавола этилади.

1990 йил

Тошкент «Шарқ гули» ишлаб чиқариш бадиий бирлашмасида Наврўз байрамининг тантанали очилиши. Тошкент, 1990 йил

Республика телевидениеси томонидан ташкил этилган ва Наврўз байрамига бағишланган 24 соатлик марафон иштирокчилари Ўзбекистон театр арбоблари уюшмаси қошидаги «Томоша» болалар ансамбли. Тошкент, 1990 йил, 19 март

Наврўз байрами учун самарқандлик ошпаз усталар икки метр узунликдаги Регистон тортини тайёрлади. Тошкент, 1990 йил

1991 йил

Регистон майдонида Наврўз байрамига бағишланган тантаналаштирилган томоша. Самарқанд, 23.03.1991 йил

Шовот туманидаги «Дўстлик» маҳалласи аҳолиси Наврўз байрами пайтида сумалак пиширмоқда. Хоразм, 1991 йил

Халқлар дўстлиги майдонида Наврўз байрами пайтида сумалак тайёрланмоқда. Тошкент, 1991 йил, 21 март

Наврўз байрами чоғида Урганч шаҳрининг Театр майдонида мусиқа ва қўшиқлар янграмоқда. Хоразм вилояти, 1991 йил, 22 март

Наврўз байрамида Хоразм вилоятидан бадиий ҳаваскорлик артистлари. Тошкент, 1991 йил, 22 март

1993 йил

Мустақиллик майдонида болалар учун ташкил этилган Наврўз байрами чоғида. Тошкент, 1993 йил, 22 март

Наврўз байрами муносабати билан халқ созандаларининг чиқиши. Тошкент, 1993 йил, 22 март

Наврўз байрамида миллий рақслар. Тошкент, 1993 йил, 22 март

Мустақиллик майдонидаги Наврўз тантаналари чоғида. Тошкент, 1993 йил, 22 март

Термиз туманидаги «Дўстлик» колхози аёллари Наврўз байрами учун сумалак тайёрламоқда. Сурхондарё вилояти, 1993 йил, 22 март

1994 йил

Жарқўрғон туманидаги Норали Боймуродов хўжалигида Наврўз байрамига сумалак тайёрланмоқда. Сурхондарё вилояти, 1994 йил, 16 март

Наврўз байрамида. Тошкент, 1994 йил, 21 март

Алишер Навоий боғидаги Наврўз байрамида раққосаларнинг чиқиши. Тошкент, 1994 йил, 21 март

Алишер Навоий боғида Наврўз байрами қатнашчилари. Тошкент, 1994 йил, 21 март

Гулистон шаҳрида Наврўз тантаналари. Сирдарё вилояти, 1994 йил, 22 март

1995−1997 йиллар

Нукусда Наврўз байрами. Нукус, 1995 йил

Наврўз байрамида. Фарғона, 1997 йил, 21 март

Нишон туманидаги Толлимаржон яйловларида Наврўз муносабати билан ташкил этилган кўпкари лавҳалари. Қашқадарё вилояти, 1997 йил, 20 март

1999−2004 йиллар

Юқори Чирчиқ туманидаги «Дўстлик» стадионидаги Наврўз байрамида карнайчиларнинг чиқишлари

Юнусобод тумани «Беруний» маҳалласида Наврўз байрами. Тошкент, 2004 йил

«Газета.uz» икки йил олдин Наврўз байрамининг 1970−1990 йилларда нишонланишига оид Кинофотофоно ҳужжатлари миллий архивидаги фотосуратларни тақдим этганди.