Toshkent viloyatining Nurafshon shahri hokimi Muzaffar Soliyev lavozimidan ozod etildi, deb xabar qildi viloyat hokimligi matbuot xizmati “Gazeta.uz”ga.
Bu haqdagi qaror 7-aprel, juma kuni xalq deputatlari kengashi sessiyasida qabul qilindi. Hokimning birinchi o‘rinbosari vaqtinchalik lavozimga tayinlandi.
Kun.uz manbasiga tayanib xabar berishicha, Soliyev uy-joy kommunal xizmat ko‘rsatish vaziri lavozimida ishlagan vaqtidagi holat bilan bog‘liq ish bo‘yicha tergovga jalb etilgan bo‘lishi mumkin.
Muzaffar Soliyev 2017-yil 5-iyuldan 2021-yil yanvarigacha uy-joy kommunal xizmat ko‘rsatish vaziri lavozimida ishlab kelgan. Prezident uni “ishda yo‘l qo‘ygan xato-kamchiliklari, berilgan ogohlantirishlardan tegishli xulosa chiqarmagani” uchun ishdan bo‘shatgandi. Soliyev 2021-yil 15-yanvardan Nurafshon hokimi lavozimida ishlab kelayotgandi.
