Shavkat Mirziyoyev Turkmanistonga rasmiy tashrifi doirasida Mahtumquli nomidagi Turkmaniston davlat universitetiga tashrif buyurdi, deya xabar bermoqda uning matbuot xizmati.

Prezidentga ushbu universitetning faxriy professori unvonini topshirish marosimi bo‘ldi. Universitet rektori Bayramgul Orazdurdiyeva va Turkmaniston Fanlar akademiyasi prezidenti Allaberdi Ashirov Shavkat Mirziyoyevga faxriy professor libosi va tegishli unvon berilgani to‘g‘risidagi sertifikatni tantanali topshirdi.


Uchrashuv ishtirokchilariga murojaatida mamlakat yetakchisi ushbu unvon uchun samimiy minnatdorlik bildirdi. Prezident ta’lim va tarbiya azal-azaldan davlatlar va xalqlar taraqqiyotini belgilab beruvchi, ularning qudratini yuksaltiruvchi kuch bo‘lib xizmat qilayotganini alohida ta’kidladi.

«Har qanday jamiyatning kelajagi bugungi yosh avlod naqadar bilimli va har tomonlama barkamol bo‘lib voyaga yetishiga bevosita bog‘liq. Aynan shuning uchun O‘zbekistonda, Turkmanistonda bo‘lgani kabi, ta’lim-tarbiya tizimida tub islohotlar amalga oshirilmoqda. Bizning maqsadimiz — Yangi O‘zbekiston yoshlarini dunyoqarashi keng, kreativ fikrlaydigan, Vatan taqdiri uchun mas’uliyatni o‘z zimmasiga olishga tayyor barkamol shaxslar sifatida voyaga yetkazish», — dedi Shavkat Mirziyoyev.

Davlat rahbari o‘z nutqida xalqaro siyosat masalalariga to‘xtalib, vujudga kelayotgan yangi xatar va tahdidlarga o‘z vaqtida javob qaytarish uchun mintaqa mamlakatlarining sa’y-harakatlarini birlashtirish zarurligini ko‘rsatib o‘tdi.

«Vaziyatdan chiqishning birma-bir yo‘li — har bir davlat, har bir xalqning manfaatlarini hisobga olish va hurmat qilishga asoslangan konstruktiv muloqot», — dedi prezident.

Shuningdek, u O‘zbekiston Turkmaniston bilan xalqaro ahamiyatga molik dolzarb masalalar yuzasidan samarali hamkorlik qilayotgani, BMT va boshqa tashkilotlar doirasida bir-birini faol qo‘llab-quvvatlab kelayotgani ta’kidladi.

Ma’lumot o‘rnida, Turkmaniston davlat universiteti mamlakatning birinchi va eng yirik universiteti. U 1931 yilda ochilgan Ashxobod pedagogik instituti negizida tashkil etilgan. O‘zbekiston prezidenti universitet hayotiga oid ko‘rgazmani ham ko‘zdan kechirdi.


Eslatib o‘tamiz, avvalroq Rossiya prezidenti Vladimir Putin O‘zbekiston prezidentini Aleksandr Nevskiy ordeni bilan mukofotlagandi.