Даврон Абдулпаттахович Ҳидоятов ва Александр Сахапов Александрович «Ўзавтосаноат» акциядорлик жамияти бошқаруви раисининг ўринбосарлари этиб тайинланди, дея хабар бермоқда компания матбуот хизмати.
Хусусан, Александр Сахапов раиснинг сотувни ривожлантириш ва маркетинг бўйича ўринбосар бўлди. У 1982 йилда туғилган, Тошкент автомобиль йўллари институтини тамомлаган.
Сахапов 2003 йилдан буён «Ўзавтосаноат» ва UzAuto Motors компанияларида турли лавозимларда ишлаган. Ушбу тайинловга қадар у UzAuto Motors компаниясининг савдо ва автосервис бўйича бошқарувчи директори бўлган.
Бундан ташқари, олти йил давомида у бош эксперт сифатида автомобилсозлик саноати масалалари билан шуғулланган, сўнгра, Вазирлар Маҳкамасининг Машинасозликни, электротехника ва авиацияни ривожлантириш, маҳсулотларни стандартлаштириш масалалари ахборот-таҳлил департаменти машинасозлик сектори мудири лавозимида фаолият олиб борган.
Даврон Хидоятов бошқарув раисининг инвестициялар ва ривожланиш масалалари бўйича ўринбосари бўлди. У 1976 йилда туғилган. Тошкент давлат иқтисодиёт университети ва Ўзбекистон банк-молия академиясини тамомлаган.
1996−2004 йилларда Ўзбекистон Марказий банки тизимида, 2004−2005 йилларда «Осиё-Инвест Банк» (Москва) бошқаруви раиси лавозимида ишлаган. 2009 йилдан 2012 йилгача GM Uzbekistan компаниясининг молия бўйича ижрочи директори, 2012 йилдан 2014 йилгача MAN Auto-Uzbekistan қўшма корхонаси бош директори лавозимларида хизмат қилган.
Хидоятов 2021 йилнинг ноябридан 2024 йилнинг 14 мартига қадар Чирчиқ шаҳри ҳокими бўлган. У 2021 йилнинг январь ойида Тошкент вилояти ҳокими вазифасини бажарувчи, март ойида эса вилоят ҳокими сифатида иш бошлаган. Аммо ўша йилнинг ноябрь ойида лавозимидан озод этилиб (унинг ўрнига Зойир Мирзаев келган), Чирчиқ шаҳри ҳокимияти раҳбарлигига ўтказилганди.
Зойир Мирзаевнинг сўзларига кўра, унинг ҳокимлик даврида Чирчиқда «аҳолининг уй-жойни тўғридан-тўғри сотиб олиш мумкинлигига ишончи йўқолган», чунки туманда уй-жой сотишда «шапка» ва «откат» олинган. Вилоят ҳокими июль ойида бўлиб ўтган йиғилишда Даврон Хидоятовни танқид қилиб, Чирчиқ шаҳридаги кўчмас мулкларни сотишда коррупцион схема мавжудлигини таъкидлаган.
