Traveltomtom номи билан танилган голландиялик саёҳатчи ва блогер Том Гронд ўз сайтида Afrosiyob поезди бошлиғи ишдан бўшатилганидан афсусда эканини билдирди ва 15 доллар пора эвазига қандай қилиб эконом-классдан VIP даражасига кўтаргани тафсилотларини сўзлаб берди.
«Мен деярли ҳеч қачон сайёҳлик агентликлари орқали саёҳат қилмайман. Бу сафар Ўзбекистонга сайёҳлик агентлиги орқали келишга қарор қилдик. Дастлабки режамиз аввало Туркманистонга, сўнг Ўзбекистонга, кейин эса Тожикистонга давом этиш эди. Эҳтимол Туркманистонга фақат сайёҳлик агентлиги орқали бориш мумкинлигини биларсиз, шунинг учун ўша сайёҳлик агентлиги Ўзбекистонга саёҳатимизни режалаштиришни таклиф қилганида, рози бўлишга қарор қилдик», — деб тушунтирди саёҳатчи.
Унинг сўзларига кўра, Ўзбекистонга уни олиб келган сайёҳлик агентлигидан ҳафсаласи пир бўлган. «Газета.uz» мухбири билан ёзишмаларда Том унинг номини айтмади, бироқ компания Ўзбекистонники ҳам, Туркманистонники ҳам эмаслигини таъкидлади.
«Биз сўраган кўп нарса режага мувофиқ чиқмади. Биз сайёҳлик агентлиги у ер- бу ерда бир неча долларни тежаш учун нималар қилганини ва бизни дуч келган меҳмонхонага жойлаштирганини тезда тушуниб етдик», — дея давом этди у.
Сайёҳлик агентлиги Самарқанд-Тошкент йўналишида қатновчи Afrosiyob тезюрар электропоездига чипталарни расмийлаштириш билан шуғулланган. Том ўзи ва жамоаси учун энг яхши чипталарни сотиб олишни сўраган, аммо талаби бажарилмаган. Йўлга чиқишдан бир кун аввал у «Ўзбекистон темир йўллари» мижозларга хизмат кўрсатиш бўлимига телефон орқали чиптани янгилаш учун қўнғироқ қилган, бироқ унга ҳеч ким ёрдам бера олмаган. Муаммолар саёҳат куни, сайёҳ вокзалга келганида ҳам давом этган.
«Гап шундаки, мен Самарқанддаги вокзални 15 дақиқадан кўпроқ айланиб, менга поезд чиптаси масаласида ёрдам берадиган одам топдим. Чиптани VIP синфига ўзгартириши мумкин бўлган расмий кассир ёки ходимга пул тўлашга тайёр эдим. Google Translate ва қўлимда пул билан мен керакли одамни қидирдим, аммо ҳеч қандай натижа бермади. Ҳеч ким менга ёрдам бера олмади. Қолаверса, ҳатто Google Translate орқали мен билан боғланишга уринган одамлар менга поезддаги кондуктор олдига бориб, VIP даражасига кўтариб беришини сўрашимни маслаҳат беришди», — деди Том ўз блогида.
Одамларнинг маслаҳати билан сайёҳ 15 доллар пора берган ва уни эконом-класс вагонидан VIP вагонга ўтказишган. Том 16 июль куни Instagram-аккаунтида (500 мингдан ортиқ обуначи) пост қолдирди. Блоггер порани айнан кимга берганини тилга олмаган.
10 октябрь куни видеони Troll.uz канали тарқатди. Хорижлик сайёҳ билан содир бўлган воқеа маълум бўлгач, «Ўзбекистон темир йўллари» компанияси поезд бошқарувчиси 10 июль куни ишдан бўшатилганини маълум қилди. Том эса 16 октябрь куни баёнот берди.
«Энг ачинарлиси шундаки, Ўзбекистон темир йўл компанияси ходими собиқ иш жойидаги мижозлар билан алоқа ва уларга хизмат кўрсатмагани учун ишдан бўшатилди. Ходимни ишдан бўшатиб, кейин коррупцияга қарши курашаётганингиздан фахрланишингизни айтасиз… бироқ Ўзбекистоннинг ушбу темир йўл компанияси ҳам ойнадаги аксига қараши керак», — дея таъкидлади блогер.
«Ўзбекистон темир йўл компанияси ўз хулосасини чиқаради, деган умиддаман, чунки уларнинг хорижликлар ва рус тилида сўзлашмайдиган сайёҳларга хизмати ўта даҳшатли! Вокзалда менга расмий равишда чипта беришда ёрдам қиладиган бир неча инглиз тилида гапира оладиган одам бўлганида эди, бу вазиятнинг олдини олиш мумкин эди «, — дея қўшимча қилди Том.
Унинг қўшимча қилишича, «Ўзбекистон темир йўллари»дан ва Ўзбекистон матбуотидан ҳеч ким нима бўлганига ойдинлик киритиш ёки муносабатини сўраш учун у билан боғланмаган.
Саёҳатчи бошқа сайёҳларни мамлакат ҳақида хулоса чиқаришга шошилмасликка чақирди. Том Ўзбекистон бўйлаб саёҳат унга маъқул келганини ва яна қайтишни режалаштираётганини айтди.
«Ўзбекистон бўйлаб саёҳат қилиш ҳайратланарли ва архитектура нуқтаи назаридан мамлакат, эҳтимол, дунёда ташриф буюриш учун энг қизиқарли мамлакатлардан бири бўлса керак. Бундай арзимаган воқеа Ўзбекистонга саёҳат режаларингизга таъсир қилмаслиги лозим», — дея хулоса қилди у.
