Шавкат Мирзиёев 3 май куни Кўксарой қароргоҳида учинчи Тошкент инвестиция форуми доирасида Хитойнинг етакчи компаниялари раҳбарлари билан учрашув ўтказди. Бу ҳақда президент матбуот хизмати хабар берди.
Учрашувда CAMCE корпорацияси раиси Ван Бо билан Тошкент шаҳрида Олимпия шаҳарчаси қурилиши ҳамда энергетика, саноат ва инфратузилма соҳаларидаги лойиҳалар портфелини кенгайтириш масалалари муҳокама қилинди.
Мамлакатда фаолият юритишда катта тажриба тўплаган компания йирик лойиҳаларни молиялаштириш, қуриш ва эксплуатация қилишнинг бутун занжирини қамраб оладиган ечимларни тақдим этишга ихтисослашган.
CAMCE раҳбарининг Шавкат Мирзиёев билан Пекинда 2023 йил октябрь ойидаги учрашувида компания Ўзбекистондаги лойиҳалар портфелини гидротехник иншоотлар қуриш билан кенгайтирмоқчи экани маълум қилинганди.
Учрашувда, шунингдек, Ўзбекистонда электр ҳисоблагичлар ишлаб чиқариш бўйича Holley Group компанияси муваффақиятли ишлаётгани қайд этилди. Тошкент вилоятида технопарк қуриш ва унга Хитойнинг йирик компанияларини жалб қилиш юзасидан келишувга эришилди.
Goldwind компанияси директори Цао Чжиган билан эса компаниянинг Ўзбекистонда «яшил» энергетикани ривожлантиришдаги иштироки истиқболлари кўриб чиқилди. Компания шамол энергетикаси технологияларини ишлаб чиқишга ихтисослашган бўлиб, жаҳондаги етакчи шамол турбиналари ишлаб чиқарувчиси ҳисобланади. Шамол электр станциялари қисмларини ишлаб чиқаришни маҳаллийлаштириш ва жорий лойиҳаларни жадаллаштиришга келишиб олинди.
Бундан ташқари, China Southern Power Grid билан Бухоро вилоятида шамол электр станциялари, бутун мамлакат бўйлаб гидроаккумуляция станциялари ва юқори кучланишли линиялар қуриш лойиҳалари муҳокама қилинди.
