Жиноят ишлари бўйича Шовот туман судининг 2024 йил 2 апрелида турмуш ўртоғини ўлдирган эркакка нисбатан суд ҳукми ўқилди. «Газета.uz» суд ҳужжатини ўрганди.
Суд ҳужжатига кўра, 1952 йилда туғилган А.Х. шифокор бўлиб ишлаб, 2011 йилда пенсияга чиққан. Турмуш ўртоғи ҳам тиббиёт соҳасида фаолият юритган. 1974 йилда турмуш қурган эр-хотиннинг 6 нафар фарзанди бўлган.
Гумонланувчининг кўрсатмасига кўра, 2023 йилнинг 16 декабр куни А.Х. ярим тунда уйғониб кетган ва аввалига турмуш ўртоғидан қон босимини туширувчи дори беришни сўраган. Турмуш ўртоғи у сўраган дориларни топиб бериб, укол ҳам қилган. Шунда А.Х. сеҳр-жоду қилингани сабаб кечалари ухлай олмаётганини айтиб, жанжал чиқарган. Сўнгра жаҳл устида иситиш печи ёнида турган болтани олиб, турмуш ўртоғининг бош қисмига 17 бор зарба берган. Бунинг оқибатида аёл оғир тан жароҳатлари олиб, воқеа жойида вафот этган.
А.Х. болтани жойига қўйиб, қўшни хонага чиқиб ётган. Бироздан сўнг ўзини ўлдириш мақсадида ошхона пичоғи билан юрак қисмига санчган, лекин пичоқ кийимларини тешиб ўтмаган.
Эрталаб фарзандлари ва ИИБ ходимлари етиб келган. Бундан хабар топган А.Х. хона эшигини ичкаридан қулфлаб, ташқарига чиқмаган. ИИБ ходимлари эшикни очишни сўраганида эса лезвия билан томирларини кесиб, ўз жонига суиқасд қилишга уринган. Бироқ ИИБ ходимлари хона ичига кириб, биринчи тиббий ёрдам кўрсатишга улгурган.
Суд ҳукмига кўра, А.Х. Жиноят кодексининг 97-моддаси 1-қисмида назарда тутилган (Қасддан одам ўлдириш) жиноятни содир қилганликда айбли деб топилди. Унга нисбатан 10 йил муддатга озодликдан маҳрум қилиш жазоси тайинланди. Айбланувчи жазони умумий тартибдаги колонияда ўташи белгиланди.
