Владимир Путин Сергей Шойгуни мудофаа вазири лавозимидан бўшатиб, Россия Хавфсизлик кенгаши котиби этиб тайинлаш ҳақидаги фармонни имзолади. Бу ҳақда «Медуза» ёзмоқда.
2008 йил май ойидан буён Хавфсизлик кенгаши котиби лавозимини эгаллаб келган Николай Патрушев «бошқа ишга ўтгани муносабати билан» лавозимидан озод этилди. Кремль «яқин бир неча кун ичида» Патрушев эгаллаши керак бўлган янги лавозимни белгилаш ҳақида маълум қилди.
Шойгу Хавфсизлик кенгашига ўтгунга қадар Россия Мудофаа вазирлигини 12 йил давомида бошқарди — 2012 йил 6 ноябрдан 2024 йил 12 майгача.
Владимир Путин Россия ҳукумати истеъфога чиқишидан олдин бош вазирнинг биринчи ўринбосари лавозимида ишлаган Андрей Белоусовни янги мудофаа вазири этиб тайинлашни таклиф қилди. Унинг номзоди 13−14 май кунлари Федерация кенгаши томонидан кўриб чиқилади. Белоусов 2013 йилда Россия президентининг иқтисодий масалалар бўйича ёрдамчиси бўлиб ҳам ишлаган.
Андрей Белоусов. Фото: government.ru
Россия президентининг матбуот котиби ҳарбий идорадаги ўзгаришларни шарҳлар экан, журналистларга Белоусовнинг тайинланиши «координаталар тизимини» ўзгартирмаслигини айтди.
«Ҳарбий тузилмага келсак, бу тайинлов амалдаги координаталар тизимини ҳеч қандай тарзда ўзгартирмайди, ҳарбий компонент ҳар доим бош штаб бошлиғининг ваколати бўлиб келган, у ўз фаолиятини давом эттиради, бу борада ҳозирча ҳеч қандай ўзгаришлар назарда тутилмаган», — дея Кремль вакилидан иқтибос келтиради «Интерфакс».
Песков, шунингдек, Шойгу Хавфсизлик кенгаши котиби сифатида бир вақтнинг ўзида Ҳарбий-саноат комиссиясида президент ўринбосари бўлишини, шунингдек, Ҳарбий-техник ҳамкорлик бўйича федерал хизматни бошқариб боришини айтди. «Олдин ҳам хабар берилганидек, федерал хизмат Мудофаа вазирлигидан президент ҳузурига ўтказилмоқда. Унинг ишига ҳам Сергей Шойгу раҳбар бўлади ва назорат қилади», — дея тушунтирди Кремль вакили.
Аввалроқ Владимир Путиннинг президентлик лавозимига киришиши муносабати билан Россия ҳукумати истеъфога чиқққани ҳақида ёзгандик.
