ОТМга кириш бўйича мандат эълон қилинди
22 август кечаси Ўзбекистонда ОТМга қабул учун якуний тест натижалари эълон қилинди. Абитуриентлар ўз натижаларини my.uzbmb.uz ва mandat.uzbmb.uz сайтлари, абитуриент ID рақамини юборган ҳолда @edtmmandatbot Telegram боти, рухсатнома QR-коди ҳамда тест натижалари қайдномаси орқали билишлари мумкин.
Абитуриентларнинг апелляция аризаларини қабул қилиш бошланди
ОТМга қабул учун тест синовлари натижасидан норози бўлган абитуриентлардан апелляция аризаларини қабул қилиш бошланди ва у 31 августга қадар давом этади. Шикоятларни кўриб чиқиш 24 августдан бошланади.
Шуҳрат Абдураҳмонов «Андижон» футболчиларига автомобиль ва iPhone 14 совға қилишини билдирди
Андижон вилояти ҳокими Шуҳрат Абдураҳмонов Суперлиганинг 17-тури доирасидаги «Андижон» — «Олимпик» (2:1) ўйинидан кейин футболчилар билан учрашди. У гол муаллифи Рубин Ҳебайга исталган автомашинасини танлашини, қолган футболчиларга эса iPhone 14 смартфонлари берилишини ваъда қилди.
Тожикистондан Ўзбекистонга олиб ўтилаётган 55 кг гиёҳванд модда тўхтатиб қолинди
Тожикистон билан чегарадаги «Ойбек» божхона постида 55 кг га яқин гиёҳвандлик воситаларини Ўзбекистонга олиб кирмоқчи бўлган шахс тўхтатиб қолинди. У моддаларни газ баллони ва бензин бакига яширган.
Самарқанд шаҳрида 49 киши фаст фуддан заҳарланди
Самарқанд шаҳрида 49 киши хот догдан заҳарланиб, шифохонага ётқизилди. Аҳволи яхшиланган 29 кишига уйга жавоб берилган. Устидан шикоят қилинган ошхона вақтинча ёпилиб, маҳсулотлари текширилмоқда.
Ўзбекистондан Қатарга тўғридан-тўғри авиарейслар йўлга қўйилди
21 август куни EASYBOOKING компанияси Centrum Air ҳамкорлигида Тошкент-Доҳа (Қатар) йўналишида илк парвозни йўлга қўйди. А-320 самолётининг биринчи йўловчилари орасида «Навбаҳор» клубининг мухлислари ҳам бор. Шунингдек, EASYBOOKING дастлабки 3 рейс йўловчиларига Қатар визасини бепул тақдим этмоқда.
ИИВ Академиясига хорижий кадрлар кириш имтиҳонисиз ўқишга қабул қилинади
2024−2025 ўқув йилидан ИИВ Академиясида хорижий давлатлар ички ишлар органлари (полиция) кадрлари ўқитилади. Улар муассасага имтиҳонларсиз қабул қилинади. Квоталарни президент белгилайди.
Фарғонада бир аёлни дўппослаб, уни зўрлаган 4 эркак 7 йилдан 9 йилгача қамалди
Бешариқ туманида оилали аёлга зўрлик ишлатиб, уриб-дўппослаган ва жинсий эҳтиёжларини қондирган 4 эркакнинг бири 9 йилга, икки нафари 8 йилга, яна бири эса 7 йилга озодликдан маҳрум этилди.
Petrovietnam яна Ўзбекистонда углеводородларни қидиради
Ўзбекистон ҳукумати ва Вьетнамнинг Petrovietnam Exploration & Production компанияси ўртасида Коссор, Шўрчашма ва Чуқуркўл участкаларидаги нефть ва газ объектларида геологик қидирув ишларини бошлаш тўғрисида битимлар имзоланди.
Қашқадарёда 17 туп арчага шикаст етказилгани аниқланди
Деҳқонобод туманида 6 туп арча тагидан, 11 туп арчанинг эса ён шохлари кесиб ташлангани учун ўрмон қўриқчисига 3,3 млн сўм жарима қўлланди. Табиатга 18 млн сўмлик зарар етказилган.
«Газета.uz»да эълон қилинган мақола:
Камбағалларнинг камбағаллигига уларнинг ўзи сабабчими? Иқтисодчи Беҳзод Ҳошимов жавоб беради
«Газета.uz» Мифономика лойиҳаси доирасида Беҳзод Ҳошимов билан камбағаллик мавзусида суҳбатлашди. Иқтисодчи бунинг сабабларини таҳлил қиларкан, баъзи мамлакатларда одамларда имконият кўпроқ экани ва шунинг учун у ерларда камбағаллик ҳам камроқлигини таъкидлади.
