22 август куни олий таълим муассасаларининг бакалавриат таълим йўналишларига кириш тест синовлари натижасидан норози бўлган абитуриентлардан апелляция аризаларини қабул қилиш бошланди, дея хабар бермоқда Билим ва малакаларни баҳолаш агентлиги матбуот хизмати.
Апелляция аризалари my.uzbmb.uz сайти орқали (абитуриентнинг шахсий кабинетида) онлайн тарзда қабул қилинмоқда ва 31 августга қадар (10 кун) давом этади.
Апелляция шикояти бериш учун тест синовида иштирок этган ва тест синовидан четлатилмаган бўлиш лозим. Аризани берган абитуриентга уни кўриб чиқиш санаси ва вақти кўрсатилган хабарнома берилади.
Хабарномада белгиланган вақтда шахсни тасдиқловчи ҳужжат, хабарнома ва абитуриент рухсатномаси билан Билимни баҳолаш агентлигига бориш керак. Шикоятларни кўриб чиқиш 24 августдан бошланади.
Шунингдек, агентлик ҳамда унинг ҳудудий бўлимларида абитуриентлар ва уларнинг ота-оналарини қизиқтирган саволларга жавоб бериш мақсадида маслаҳат марказлари ташкил этилди. Бунда улар ўзларини қизиқтирган саволларга жавоб олиш учун Тошкент шаҳрига келишлари шарт эмас.
«Абитуриентларни табақалаштирилган ёки оширилган контракт асосида талабаликка қабул қилиш агентлик ваколатига кирмайди. Мазкур масала юзасида бевосита олий таълим муассасасининг ўзига мурожаат қилиш ва тўлиқ маълумот олиш мумкин», — дейилади хабарда.
Эслатиб ўтамиз, 22 августга ўтар вақтда ОТМга қабул учун якуний тест натижалари эълон қилинди. Абитуриентлар ўз натижаларини my.uzbmb.uz ва mandat.uzbmb.uz сайтлари, абитуриент ID рақамини юборган ҳолда @edtmmandatbot Telegram боти, рухсатнома QR коди ҳамда тест натижалари қайдномаси орқали билишлари мумкин.
