Ўзбекистон Энергетика вазирлиги Россия газини мамлакатга етказиб бериш бўйича 16 июнь куни Санкт-Петербург халқаро иқтисодий форумида имзоланган келишувнинг айрим тафсилотларини эълон қилди. Келишувга қўшимча равишда Ўзбекистон газ узатиш тизимини Россия қувури газини қабул қилиш ва ташишга тайёрлаш бўйича йўл харитаси имзоланган.
Энергетика вазирлиги хабарида айтилишича, газни сотиб олиш ва сотиш бўйича шартнома UzGasTrade ва «Газпром Экспорт» компаниялари ўртасида икки йил муддатга тузилган. Уни Ўзбекистон энергетика вазири Жўрабек Мирзамахмудов ва «Газпром» бошқаруви раиси Алексей Миллер ишончнома асосида имзолаган.
«Келишув тўлиқ тижорат шартларида ишлаб чиқилган бўлиб, республика истеъмолчиларининг табиий газга бўлган йил сайин ортиб бораётган талабини қисман қондириш, шунингдек, куз-қиш мавсумини узилишларсиз ўтказишга қаратилган чора-тадбирлардан биридир», — дейилади хабарда.
Келишув доирасида 1 октябрдан кунига 9 миллион куб метр газ етказиб бериш бошланиши кутилмоқда. Шундай қилиб, йиллик ҳажм қарийб 2,8 миллиард куб метрни ташкил этади, деб қайд этган Энергетика вазирлиги.
«Табиий газнинг нархи вилоятдаги бозор нархлари, республикадаги жорий нархлар, шунингдек, бозор шароитларидан келиб чиқиб нархларни шакллантириш бўйича режалаштирилган ислоҳотлардан келиб чиқиб келишилган», — дейилади вазирлик хабарида.
«Аввал Россияга табиий газ Қозоғистон орқали „Марказий Осиё — Марказ“ газ қувуридан транзит қилиб етказиб берилгани, эндиликда эса газ тескари режимда (қарама-қарши йўналишда) Ўзбекистонга етказиб берилишини, шунингдек, Ўзбекистон ҳудудида янги газ ўлчаш станцияларини қуриш зарурлигини ҳисобга олиб, „йўл харитаси“ билан режалаштирилган тадбирларни сентябрь ойига қадар якунлаш режалаштирилган», — дейилади хабарда.
Ўзбекистон газ транспорти тизимида 3 дона газ ҳайдаш ускунасини алмаштириш ва 11 дона турли газ ҳайдаш ускуналарини капитал таъмирлаш ва тиклаш ишларини бажариш, шунингдек, 22 километр янги магистраль газ қувурларини қуриш ва 56 км газ қувурлари газ қувурларини таъмирлаш режалаштирилган, деб хабар берди Энергетика вазирлиги.
Аввалроқ Россиянинг «Коммерсантъ» газетаси томонлар йилига қарийб 6 миллиард куб метр ёки кунига тахминан 18 миллион куб метр газ етказиб беришга келишиб олгани, бунда етказиб бериш ҳажми ҳар йили аниқлаштирилиши ҳақида хабар берганди.
