20 октябрь куни президент «Ўзбекистон Республикаси Давлат солиқ қўмитаси ҳузуридаги Кадастр агентлиги фаолиятини янада такомиллаштириш чора-тадбирлари тўғрисида»ги [ПҚ-405-сонли] қарорни маъқуллаб, имзо чекди. Бу ҳақда Адлия вазирлиги хабар бермоқда.
1 январдан Кадастр агентлигининг ўзи ҳудудий тузилмалар фаолиятини ташкил этади. Ҳудудий бошқарма ва бўлимлар фаолиятини молиялаштириш республика бюджетидан амалга оширилади.
Ҳудудий бўлимлар, Давлат кадастрлари палатаси ҳудудий бошқармалари ва туман (шаҳар) филиалларининг фаолиятига ҳокимлар аралашиши ёки таъсир ўтказиши қатъий тақиқланади.
Шунингдек, 1 июлгача Кадастр агентлиги органларига тааллуқли маъмурий ҳуқуқбузарликлар тўғрисидаги ишларни «E-ma'muriy ish» тизими орқали электрон кўриб чиқиш имкони яратилади.
Бундан ташқари қарор билан Кадастр агентлиги марказий аппаратида — Фазовий маълумотлар миллий инфратузилмасини ривожлантириш бошқармаси ташкил этилди.
Кадастр агентлигининг ҳудудий бошқармаларида — чегара масалалари бўйича бош мутахассис лавозими жорий этилди.
Шунингдек, Тошкент геодезия ва картография коллежида — Кадрларни қайта тайёрлаш ва уларнинг малакасини ошириш маркази, «Геоинновация маркази» ДУК тузилмасида — қиёслаш ва калибрлаш лабораторияси, докторантура фаолияти, Фазовий маълумотлар соҳасида стандартлаш бошқармаси ҳамда Илмий тадқиқот фаолиятини мувофиқлаштириш бўлими ташкил этилди.
Янги ўзлаштирилган ерлар Қишлоқ хўжалиги вазирлиги хулосасига мувофиқ вилоят ҳокимлари қарорига асосан қишлоқ хўжалигига мўлжалланган ерлар тоифасига киритилади.
Бундан ташқари қарор билан 2023−2026 йилларда Кадастр агентлиги фаолиятининг асосий прогноз кўрсаткичлари ва унинг моддий-техника базасини такомиллаштириш дастурига кўра, агентлик 25 169 гектар ер участкаларини ўлчаб уларнинг электрон хариталарини яратади.
