Шавкат Мирзиёев 1 май куни Тошкент халқаро инвестиция форуми ва Хорижий инвесторлар кенгашининг иккинчи мажлиси арафасида Европа тикланиш ва тараққиёт банки (ЕТТБ) президенти Одиль Рено-Бассо бошчилигидаги делегацияни қабул қилди. Бу ҳақда давлат раҳбари матбуот хизмати хабар берди.
Томонлар Ўзбекистон ва ЕТТБ ўртасида сўнгги йилларда эришилган «юксак даражадаги шериклик, яқин ва самарали ҳамкорлик»ни қайд этди.
Бугунги кунга келиб, банкнинг мамлакатдаги лойиҳа портфели 4,4 миллиард евродан ошган. Уларда хусусий секторнинг улуши 70 фоизга яқин.
Ўзбекистон ва ЕТТБ ўртасида ҳамкорлик йўналишлари ва кўламини, биринчи навбатда, кичик ва ўрта бизнес, аёллар тадбиркорлиги, муқобил энергия, рақамли технологиялар ва бошқа йўналишларда кенгайтириш мақсадида янги Шериклик стратегияси қабул қилинди.
ЕТТБ кўмаги ва бевосита иштирокида давлат корхоналарини хусусийлаштиришга тайёрлаш тадбирлари кўрилмоқда, банк-молия секторида йирик битимлар амалга оширилди, «яшил» энергия, транспорт инфратузилмаси, экология ва бошқа соҳаларда меъёрий-ҳуқуқий база такомиллаштирилмоқда.
Шавкат Мирзиёев сув таъминоти, энергетика, йўл инфратузилмаси, «яшил» шаҳарларни ривожлантириш бўйича янги лойиҳаларни тез фурсатда тайёрлаш ва амалга ошириш муҳимлигини таъкидлади.
Хорижий инвесторлар кенгашининг бўлажак мажлиси кун тартиби юзасидан ҳам фикр алмашилди.
