Фарғона вилояти Данғара туманида 16 май куни отасини ўлдириб қўйган 25 ёшли йигитга суд ҳукми ўқилди.
«Sevimli» телеканалининг «Zamon» дастури репортажида таъкидланишича, ота спиртли ичимлик ичишга ружу қўйган ва хотинини маст ҳолда мунтазам равишда калтаклаб келган.
Йигитнинг тергов ва суд жараёнида берган кўрсатмаларига кўра, отасининг спиртли ичимлик ичишига муккасидан кетиши бир неча марта оилавий келишмовчиликларга сабаб бўлган.
Жиноят содир этилган кунда ҳам эркак уйга келиб, хотинидан биринчи гуруҳ ногиронлиги учун оладиган нафақа пулини беришни талаб қилган ва яна ароқ сотиб олишини билдирган. Аёл пул йўқлигини айтганида эр уни ура бошлаган. Ҳолатга гувоҳ бўлган йигит отасига ташланиб, ерга ётқизган ва кўкрак қисмига бир неча марта тепган. Якунда эса йигит отасининг эгнида бўлган кийим боғичи билан бўғиб ўлдирган.
Судланувчининг кўрсатмалари, ҳужжат ва далилларга таянган ҳолда ЖИБ Данғара туман суди йигитни ЖКнинг 97-моддаси 1-қисмида (Қасддан одам ўлдириш) назарда тутилган жиноятни содир этганликда айбли деб топилди. Унга 10 йиллик муддатга озодликдан маҳрум қилиш жазоси тайинланди.
