АҚШнинг Ўзбекистондаги элчиси лавозимига президент Жо Байден илгари сурган Жонатан Ҳеник номзоди АҚШ Сенати томонидан тасдиқланди.
Жонатан Ҳеник амалдаги элчи, АҚШнинг Қозоғистондаги элчиси лавозимида фаолиятини давом эттирадиган Дэниел Розенблюм ўрнини эгаллайди.
Жонатан Ҳеник — АҚШ дипломатик хизматининг маслаҳатчи-элчи мақомига эга юқори лавозимли амалдор ҳисобланади. Ўтган йилдан бери у Миллий мудофаа университети қошидаги Ахборот ва кибермакон коллежида АҚШ Давлат департаменти кафедраси мудири лавозимида ишлаб келмоқда.
Илгари у Жанубий ва Марказий Осиё масалалари бюросида Давлат котиби ёрдамчисининг ўринбосари лавозимида ишлаган. У Марказий Осиё давлатлари, шунингдек, Жанубий ва Марказий Осиёда жамоатчилик дипломатияси ва ОАВ билан алоқалар бўйича масъул бўлган.
Бунга қадар у АҚШ Давлат департаментининг Глобал ҳамкорлик марказида координатор ўринбосари бўлиб ишлаган ва Россия, Хитой ва Эрондан келаётган дезинформацияга қарши АҚШнинг саъй-ҳаракатларини мувофиқлаштириш соҳасида ишлаган.
Шунингдек, у АҚШ Давлат департаменти Халқаро ахборот дастурлари бюроси координаторининг биринчи ўринбосари ва координатор вазифасини бажарувчи сифатида ишлаган.
У Туркияда жамоатчилик билан алоқалар бўйича маслаҳатчи-элчи, Тимор-Лештида миссия бошлиғининг ўринбосари, шунингдек, Озарбайжон, Туркия, Португалия ва Ўзбекистонда бошқа лавозимларда ҳам фаолият юритган.
Жонатан Ҳеник Жорж Вашингтон университетида илмий ходим ва таклиф этилган профессор, Гавайи оролларидаги Гонолулу шаҳридаги Шарқ-Ғарб марказида (East-West Center) резидент дипломат бўлиб ишлаган.
Нью-Йоркда туғилган Жонатан Ҳеник рус, португал, турк ва озарбайжон тилларини билади. У Гавайи университетида сиёсат фанлари номзоди (PhD), Нью-Йоркдаги Колумбия университетининг халқаро алоқалар бўйича магистр ва шу университетнинг Колумбия коллежи бакалаври даражасига эга.
Аввалроқ, «Газета.uz» АҚШнинг Ўзбекистондаги дипломати Дэниел Розенблюм билан катта интервью ташкил этиб, Америка ташқи сиёсатининг Ўзбекистондаги устувор йўналишлари, ислоҳотлардаги ютуқ ва муваффақиятсизликлар, сўз эркинлиги ва мамлакат ривожи ўртасидаги алоқалар, қолаверса, Конституция ислоҳотлари ҳақида суҳбатлашганди.
