Тошкентнинг «Пахтакор» футбол клуби жамоага Максим Шацких бош мураббий этиб тайинланганини малум қилди.
43 ёшли мутахассис билан 3 йиллик шартнома имзоланган, бу эса клубнинг Шацких билан режалари катталигини кўрсатади, дейилади хабарда.
Бунгача у июнь ойидан бери «Пахтакор»да спорт директори сифатида ишлаб келаётганди. Валерий Лобановский сингари мутахассис қўл остида «Динамо» Киевда ўйнаган Шацких замонавий футбол билимларини яхши ўзлаштирган. Январь ойидан бери жамоани бошқарган Шимолий Македония терма жамоасининг аввалги бош мураббийи Славче Воинески йил охиригача тузилган шартномани муддатидан олдин бекор қилинганидан сўнг ишдан бўшатилганди.
Жисмоний тайёргарлик мураббийи сифатида украиналик Виталий Шпанюк таклиф этилди. 51 ёшли мутахассис фаолияти давомида Украинанинг «Кремень», «Арсенал», «Славутич», «Карпати», «Львов», «Ворскла» ва ЛНЗ, Россиянинг «Анжи», «Ротор», Грузиянинг «Динамо» Тбилиси клубларида ишлаган. Шунингдек, уч ярим йил давомида Украина миллий терма жамоасида ишлаган.
Шацкихнинг ёрдамчиси сифатида Вячеслав Беляев фаолият олиб боради. У Украинанинг «Таврия», «Металлист», Грузиянинг «Динамо» (Тбилиси) ва Россиянинг «Ротор» клубларида ишлаган. Маҳаллий мутахассислардан Денис Иванков (дарвозабонлар мураббийи), Камолиддин Тожиев (ёрдамчи) ва Юрий Сиянов (жисмоний тайёргарлик) Шацкихга ёрдам беришда давом этишади.
«Пахтакор» жорий мавсумда Осиё Чемпионлар лигасида гуруҳдан чиқа олмади ва Ўзбекистон Суперлигаси турнир жадвалида 23 очко билан пешқадам «Навбаҳор»дан 2 очко ортда қолиб, 3-ўринни эгаллаб турибди.
