Тошкент вилоятида ер майдонини ноқонуний тарзда сотишга уринган фуқаро қўлга олинди. Бу Бош прокуратура ҳузуридаги департамент, ДХХ ва ИИББ ходимлари билан ҳамкорликда ўтказилган тезкор тадбирда аниқланди.
Таъкидланишича, Янгийўл туманида фуқаро А.Ж. Ш. нинг номига 40 сотих ер майдонини ажратиш учун ҳужжатларни расмийлаштириб беришига ишонтирган. У фуқарога бу ишни ўзининг Кадастр агентлигида ишловчи танишлари орқали амалга оширишини айтган.
Бунинг эвазига 29 минг АҚШ доллари сўраб, ушбу маблағнинг 10 минг долларини олдиндан олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилди. Ҳозирда тергов ҳаракатлари ўтказилмоқда.
Аввалроқ Тошкент шаҳар ИИББ ходимлари Янгиҳаёт туманидаги 1 гектар ерни 1 миллион долларга сотишни ваъда қилган икки нафар шахсни қўлга олгани ҳақида ёзган эдик.
