Эрон ва МAР бадалларни тўламагани учун БМТ Бош ассамблеясида овоз бериш ҳуқуқидан маҳрум қилинди
Икки йил давомида БМТ бюджетига доимий бадал тўламагани учун Эрон ва Марказий Aфрика Республикаси (МАР) ташкилот Бош ассамблеясида овоз бериш ҳуқуқидан маҳрум этилди. Бу ҳақда БМТ Бош котиби Aнтониу Гутерриш томонидан БМТ Бош ассамблеясининг 75-сессияси раиси Волкан Бозкирга юборилган хатда айтилган. Эрон ва МAР мамлакатларидан ташқари Комор ороллари, Сомали, Сан-Томе и Принсипи давлатлари аъзолик бадалларини тўламаган. Бироқ БМТ бош котибининг мактубида ушбу уч давлат Бош ассамблеяда 75-сессияси тугагунига қадар овоз бериш ҳуқуқини сақлаб қолиши таъкидланган.
БМТнинг доимий бюджетига бадаллари аҳоли жон бошига тушадиган даромад ва ташқи қарзни ҳисобга олган ҳолда, 10 йиллик даврдаги мамлакатнинг ўртача ЯИМ миқдорида белгиланади. Таъкидланишича, агар мамлакатга боғлиқ бўлмаган ҳолатлар туфайли тўлов кечиктирилган бўлса, Бош Ассамблеяси БМТга аъзо давлатларга овоз беришда қатнашишга рухсат бериши мумкин. Шунингдек, овоз бериш ҳуқуқи қарзни тўлаган мамлакатга автоматик равишда қайтарилади. Бош котибнинг мактубига кўра, овоз бериш ҳуқуқини тиклаш учун Эрон ташкилот бюджетига 16,3 млн доллар, МАР эса 29,4 минг доллар тўлашлари керак. — ТАСС.
«Олигарх» тушунчаси Украина қонунчилигига киритилади
Украина президенти Владимир Зеленский Олий Радага олигархларнинг ҳаддан ташқари таъсирига қарши қонун лойиҳасини тақдим этди. Президент ўзининг матбуот хизмати орқали ушбу қонун олигарх деб тан олинадиганларнинг ҳуқуқларини бузмаслигини, аммо ушбу концепциянинг таърифи киритиши, олигархлар доираси белгиланиши ва уларнинг ҳокимият билан ўзаро муносабатлари қоидаларини киритилишини таъкидлади. Янги қонун ўн йилга жорий этилиши режалаштирилган.
Мамлакатнинг сиёсий ва иқтисодий ҳаётига жиддий таъсир кўрсатадиган, шунингдек, медиа маконининг асосий сегментларини назорат қиладиган шахс «олигарх» деб ҳисоблаш таклиф этилмоқда. Шахсни олигарх деб тан олиш тўғрисида қарорни Украина Миллий хавфсизлик ва мудофаа кенгаши (СНБО) қабул қилади. Ушбу орган, шунингдек, олигархлар реестрини юритади. Юқори лавозимли амалдорлар, ўринбосарлар, судьялар ва махсус хизматларнинг раҳбарлари олигархлар билан алоқаларини кўрсатишлари керак бўлади. Олигархларнинг ўзи сиёсий партияларни молиялаштириш ва йирик активларни хусусийлаштиришда иштирок этишни тақиқлашга таклиф қилинмоқда. — Ҳужжат.
Аввалроқ Украина президенти унинг раҳбарлик фаолиятидаги устувор йўналишларни, яъни олигархларсиз, урушсиз ва ҳамма қонун олдида тенг бўлган мамлакатни қуриш деб таъкидлагани ҳақида хабар берган эдик.
Ташкилий қўмита раиси пандемия сабабли Олимпиаданинг бекор қилинишига қарши чиқди
Токио ўйинлари ташкилий қўмитаси раиси Сейко Хасимото Ёзги Олимпия ўйинларининг бекор қилиниши ёки қолдирилишига қарши чиқмоқда. «Биз яна кейинга қолдира олмаймиз» — деди у. — Интерфакс.
Токио шаҳар ассамблеясининг аксарият депутатлари Ўйинларнинг бекор қилинишига мойил. Япониянинг бош тиббий маслаҳатчиси Сигэру Омининг 3 июнь куни парламент қўмитасида айтишича, ҳозирги эпидемиологик ҳолатни ҳисобга олган ҳолда Олимпиадани ўтказиш «нотўғри». Токиода ишлайдиган олти мингга яқин шифокорлардан ташкил топган уюшма ушбу ёзда ўтказиладиган Олимпия ўйинларини бекор қилишни зарур деб ҳисобламоқда. 7 май куни 190 мингдан зиёд киши Токио-2020 Олимпия ўйинларини бекор қилишни талаб қиладиган онлайн-петицияни имзолаган эди.
Халқаро олимпия қўмитаси Pfizer ва BioNTech билан Токио Олимпиадаси иштирокчиларига вакциналарни етказиб бериш тўғрисида меморандум имзоланганлиги ҳақида хабар берган эдик.
Эслатиб ўтамиз, Олимпия ўйинлари 23 июлдан 8 августгача, Паралимпия 24 августдан 5 сентябргача бўлиб ўтади. Спорт тадбирларига чет элдан томошабинлар келиши тақиқланди.
Microsoft Windowsнинг янги версиясини тақдим этади
Тақдимот 24 июнь кунига мўлжалланган. Янги дастурий таъминот интерфейс дизайнидаги ўзгаришларни, Windows app store (дастурлар дўкони) орқали яратувчилар ва ишлаб чиқувчилар учун қўшимча имкониятларни, шунингдек фойдаланувчилар ва жамоалар ўртасидаги алоқаларни осонроқ ўрнатиш усулларини ўз ичига олади. Дастурий таъминот дастлаб тақдимотдан сўнг янги маҳсулотларни синаб кўриш учун рўйхатдан ўтган Windows синовчиларига тарқатилади. Расмий чиқиши кузга режалаштирилган. — Bloomberg.
КХДРда мамлакат раҳбари ўринбосари лавозими жорий этилди
Корея ишчилар партиясида (КИП) биринчи котиб лавозими жорий этилди. Маълум қилинишича, биринчи котиб КИП бош котиби Ким Чен Иннинг ўринбосари вазифаларини бажаради. Айтилишича, ушбу лавозимни КХДР етакчисининг синглиси Ким Ё Чжон эгаллаши мумкин. «Фавқулодда вазиятлар, шу жумладан Ким Чен Иннинг соғлиғи билан боғлиқ вазиятларда, Ким Ё Чжон ўринбосар лавозимини эгаллаши мумкин ва ҳокимият Ким Чен Иннинг ўғлига ўтган пайтгача вақтинча ворис вазифасини бажаради», дея Рёнхап Жанубий Кореянинг собиқ бирлашиш вазири Ли Чон Сокнинг сўзларини келтиради. Ли Чон Сок биринчи котибни сайлаш партия қурултойини чақиришни талаб қилмаслигини таъкидлади. Шахс партия марказий қўмитасининг ялпи мажлисида ушбу лавозимга тайинланиши мумкин. — Рёнхап.
Шунингдек:
- Ryanair билан бўлган воқеадан сўнг «Белавиа» компанияси 21 та мамлакатга рейсларни амалга ошира олмайди.
- Ҳозирга қадар Белорусия судлари Telegram мессенжеридаги деярли 60 та канал ва чатларни экстремистик деб топди. 24 май ҳолатига кўра бундай канал ва чатлар сони 50 тани ташкил қилган эди.
- Колумбия Миллий иш ташлаш қўмитаси 9 июнь куни Боготада янги кенг миқёсли норозилик намойишини ўтказишга қарор қилди. Аввалроқ қўмита томонидан 12 май ва 2 июнь кунлари умуммиллий намойишлар ўтказилишини эълон қилинган эди. Мамлакатда солиқ ислоҳотларига қарши намойишлар 28 апрелдан бери бўлиб ўтмоқда.
- Чехия парламенти Сенатининг Хавфсизлик қўмитаси республика президенти Милош Земанга импичмент тартибини бошлаш тўғрисида таклиф киритди.
- NASA Венеранинг атмосфераси ва геологик хусусиятларини ўрганиш учун сайёрага иккита янги миссия юбораётганини эълон қилди.
- Шри-Ланка қирғоғи яқинида кимёвий моддалар билан юкланган кеманинг ёниб ва чўкиб кетгани Ҳинд океанида экологик фалокатни келтириб чиқарди. 20 май куни X-Press Pearl контейнер кемаси Коломбо шаҳридан 18 километр шимоли-ғарбда бўла туриб, портга кириш учун рухсат кутиб турганида, бортда ёнғин бошланди. Сўнгра портлаш содир бўлди.
