Коломбо яқинида кимёвий моддалар тўлдирилган контейнер кемаси олти кундан буён ёнмоқда
Шри-Ланка пойтахти Коломбо яқинида денгизда кимёвий моддалар тўлдирилган контейнер кемаси олти кундан буён ёнмоқда. Ёнғин билан бешта буксир кемаси курашмоқда. Ҳудуддаги кучли шамол ёнғинни ўчиришга халақит бериб, ёнишни кучайтирмоқда. Экипаж ва қутқарувчилар кемада портлаш содир бўлишидан бир кун олдин эвакуация қилинган. Ёнғин натижасида бир нечта контейнер денгизга тушиб кетган, маҳаллий балиқчиларга ушбу жойни тарк этиш тавсия этилди.
20 май куни X-Press Pearl контейнер кемаси Коломбо шаҳридан 18 километр шимоли-ғарбда бўла туриб, портга кириш учун рухсат кутиб турганида, ёнғин бошланди. Дастлабки маълумотларга кўра, ёнғин хавфли юк туфайли содир бўлган. Кемада 1485 та контейнерда 25 тонна азотли кислота ва бошқа кимёвий моддалар бўлган. Сингапур байроғи остидаги ушбу кема 15 май куни Ҳиндистоннинг Хазира портидан чиқиб кетган эди. — Интерфакс.
AҚШ Конгресси Хитойга қарши қаратилган қонун лойиҳасини тақдим этди
AҚШ Конгресси Вакиллар Палатаси ташқи алоқалар қўмитаси раиси Грегори Микс 25 май куни «Хитойнинг чақириқлари»га қарши курашишга қаратилган қонун лойиҳасини тақдим этди. «AҚШнинг глобал етакчилиги ва ҳамкорлигини таъминлаш» деб номланган ҳужжат, муаллифга кўра, мамлакат институтлари ва дипломатиясини мустаҳкамлашга қаратилган. «Хитой тобора кўпроқ қоидаларга асосланган тартибни бузишга ва AҚШга қарши чиқишга уринмоқда. Биз ўз кучимизни ишга солишимиз ва Хитой томонидан юзага келадиган ҳақиқий таҳдидларга эътибор қаратишимиз керак», деди конгрессмен. Хусусан, қонун лойиҳаси муаллифлари Ҳиндистон-Тинч океани минтақаси билан иш олиб борадиган Давлат департаменти ходимларини кўпайтиришни, шунингдек, БМТ ва АТЭС доирасидаги ҳамкорликни кенгайтиришни таклиф қилмоқда.
Хитой ҳукумати мамлакатга қарши курашиш тўғрисидаги қонун лойиҳасининг кўриб чиқилиши муносабати билан AҚШга кескин норозилик билдирди. «Тегишли қонун лойиҳаси фактларни эътиборсиз қолдириб, Хитойнинг ривожланиш йўлини ва олиб бораётган сиёсатини қораламоқда. Бундай ҳаракатлар ХХР ички ишларига аралашиш ва унинг манфаатларини бузишга уринишдир. Биз бу борада кескин норозилик билдирамиз ва ўз манфаатларимизни қатъий ҳимоя қиламиз», деди ХХР ТИВ вакили Чжао Лицзянь.
Сурияда президент сайловларига овоз бериш жараёни бошланди
Сайлов участкалари соат 07:00 да очилиб, соат 19:00 гача ишлайди. Давлат раҳбари лавозими учун учта номзод кураш олиб бормоқда: амалдаги президент Башар Aсад, собиқ давлат вазири Aбдулла Саллум Aбдулла ва ватанпарвар мухолифат вакили Маҳмуд Aҳмед Мурай. Маълумотларга кўра, сайловларда 18 млндан зиёд фуқаро овоз беради. Таъкидланишича, мамлакатда коронавирус инфекцияси хавфини ҳисобга олган ҳолда зарур бўлган санитария-профилактика чоралари олдиндан кўрилган.
21 апрель куни Сурияда президент сайловларида илк бор аёл киши қатнашиши мумкинлиги ҳақида хабар берган эдик.
Буюк Британия, AҚШ, Германия, Франция ва Италия халқаро ҳамжамиятни Суриядаги президент сайловини тан олмасликка чақиришди. Уларнинг фикрига кўра, сайловлар мамлакатдаги сиёсий инқорзни ҳал қила олмайди.
Украина октябрь ойигача Россия ва Беларусдан электр энергиясини импорт қилишни тақиқлади
Украина энергетика ва коммунал соҳаларини давлат томонидан тартибга солиш бўйича миллий комиссияси Россия ва Беларусдан мамлакатга электр энергиясини импорт қилишни тақиқлайди. Чекловлар 2021 йил 1 октябргача амал қилади. Комиссия раҳбари Валерий Тарасюк 1 октябрдан кейин ушбу тақиқнинг узайтирилишини истисно қилмади. «Биз ушбу қарорни бизга шундай илтимос билан мурожаат қилган энергетика вазири Герман Галущенконинг ташаббуси билан қабул қилдик» — деди у. — Интерфакс.
Ҳиндистоннинг шарқий қирғоғига кучли бўрон келди
Ҳиндистоннинг шарқий қирғоғига «Яас» бўрони келди. Тошқин хавфи туфайли 1,2 млндан зиёд киши эвакуация қилинди. Фуқаролар баъзи жойларда уйларнинг томидан баландроқ бўлиши мумкин бўлган тўлқинлар хавфи ҳақида огоҳлантирилди. Кучли ёмғирлар ва бўронли шамол туфайли ҳудудда кўплаб дарахтлар синган, шунингдек электр узатиш тармоқлари узилган. Табиий офат туфайли Колката аэропорти ёпилди. Жабрланганлар тўғрисида маълумот йуқ. — Интерфакс.
Аввалроқ Ҳиндистоннинг ғарбий қисмига келган ёмғирли циклон камида 21 кишининг ўлимига сабабчи бўлгани ҳақида хабар берган эдик.
Канададаги Беларус элчихонаси 1 сентябрдан ёпилади
Канададаги Беларус элчихонаси республика ҳокимиятининг тегишли қароридан сўнг 1 сентябрь куни ёпилади. Консуллик бўлими ҳужжатларни қабул қилиш ва кўриб чиқишни 10 июлда тўхтатади. Канададаги элчихонанинг консуллик вазифаларини келажакда Нью-Йоркдаги бош консуллик амалга ошириши мумкин, дейилади баёнотда. 6 апрель куни Беларус президенти Aлександр Лукашенко мамлакат элчихоналари ва дипломатик ваколатхоналар ходимларининг сонини оптималлаштиришни таклиф қилган эди. — ТАСС.
Шунингдек: Беларус ташқи ишлар вазири Владимир Макей мамлакатнинг бир қатор элчихоналарига қаттиқ босим ва ҳатто жисмоний таҳдидлар ўтказилаётганини айтди. «Бир қатор қонун устуворлиги деб номланган давлатлардаги элчихоналаримизга қаттиқ босим ўтказилмоқда. Психологик ва жисмоний таҳдидлар қилинмоқда, байроғларимиз ҳақорат қилинмоқда, маҳаллий ҳокимият эса буни кўрмасликка олмоқда ёки кечикиш билан муносабат билдирмоқда», деди вазир.
Нью-Йоркда Жорж Флойд хотирасига бағишланган акция бўлиб ўтди
Фото: Денис Акишев/ТАСС
Бир йил олдин полиция томонидан ҳибсга олинаётганда вафот этган қора танли Жорж Флойд хотирасига бағишланган бир нечта акциялар Нью-Йоркда, тинч муҳитда бўлиб ўтди. Қайд этилишича, тадбирда 200 яқин киши қатнашди. Aкция иштирокчилари орасида ирқий тенглик билан бир қаторда, масалан, Фаластинни қўллаб-қувватлаш ва иқлим ўзгаришига қарши кураш учун ҳаракат қиладиган чап қанотларнинг турли сиёсий ҳаракатлари вакиллари бор эди. Бундан бир кун аввал Нью-Йорк полицияси бош қароргоҳи олдида кичик митинг бўлиб ўтди. Бунга ўнга яқин одам ташриф буюрди. Тадбир қатнашчилари қора танлиларни ҳибсга олишда куч ишлатишнинг барча ҳолатларини жамоатчиликка маълум қилиш талаби билан чиқишдилар.
Бир йил аввал Американинг Миннеаполис шаҳрида яшовчи афроамерикалик Жорж Флойд қўлга олиш вақтида вафот этган эди. Унинг ўлимидан сўнг мамлакат бўйлаб норозилик намойишлари бошланди. Жорий йилнинг март ойида Миннеаполис шаҳри раҳбарияти Флойднинг оиласига 27 млн доллар тўлашга қарор қилди. Ушбу товон пули Миннеаполис шаҳридаги полиция ходимлари томонидан одам ўлдирилиши учун тўланган компенсациялар орасида рекорд маблағ бўлди. Бир ой аввал собиқ полициячи Дерек Шовин Жорж Флойдни ўлдиришда айбдор деб топилган эди.
Шунингдек:
- «Толибон» ҳаракати Афғонистонга қўшни давлатларни ўз ҳудудига чет эл қуролли кучларини жойлаштирмасликка чақирди. «Биз ўз еримиздан бошқалар хавфсизлигига қарши фойдаланилмаслигини бир неча марта маълум қилдик ва бошқаларни ҳам ўз ерлари ва ҳаво ҳудудларидан мамлакатимизга қарши фойдаланмасликка чақирамиз», — дейилади баёнотда.
- Беларус президентининг таъкидлашича, Ryanair самолётида бомба борлиги ҳақидаги хабарлар бир вақтнинг ўзида Афина, Вилнюс ва Минск аэропортларига келган. Бироқ Швейцария авиация маъмурлари бу ҳақда хабарсиз бўлганликларини маълум қилишди.
