10 декабрь куни бастакор, рэпер Алишер Валиев [тахаллуси Моргенштерн] Тошкентга келди. Бу ҳақда у ўзининг Instagram`даги Stories`да эълон қилди. У видеода автомобилни ўз эгасига топшириш мақсадида Тошкентга келганини таъкидлаган. Тасвирлардан у Hilton меҳмонхонаси ёнида эканини кўриш мумкин. Ҳозирча божхона тўлови қанчага тушгани маълум эмас.
Аввалроқ, 18 октябрь куни Моргенштерн Instagram саҳифасида ўзининг Mercedes-Benz Э200 автомобили учун танлов эълон қилган эди. Танловда қатнашган 907 мингдан ортиқ фойдаланувчилар орасида бухоролик Азим Абдуллаев ғолибликни қўлга киритган.
«Мен автомобилни дунёнинг ҳар қандай нуқтасига етказиб беришни ваъда қилганман. Ўзбекистон бўлса, Ўзбекистон-да. Агар чегаралар ёпиқ бўлса, кутишимиз мумкин. Чегаранинг ўзида машинани ўтказиб бериш ҳам мумкин. Божхона расмийлаштируви талаб қилинса, уни ҳам тўлаймиз», — деган эди бастакор.
Орадан кўп вақт ўтмасдан жонли эфирда, «Ўзбекистонда машина учун божхона тўлови қанча эканини биласизми? Машина нархига тенг экан», — дея хабар қолдирган эди. Ўшанда рэпер қиммат божхона тўлови сабабли ёрдам ҳам сўраганди. «Биз шов-шув кўтариб борамиз ва машинани ҳамюртингизга топширамиз. Сизлар ҳам бизга пешвоз чиқинг», — деган Моргенштерн.
Ноябрь бошида Давлат божхона қўмитаси дастлабки ҳисоб-китобларга таяниб, автомобилни «растаможка» қилиш 538 млн 713 минг 760 сўм асосида божхона тўловлари ҳисобланганда, ундирилиши мумкин бўлган миқдор 353 млн 801 минг 986 сўмни [қарийб $34 минг] ташкил этишини маълум қилганди.
