Россиялик таниқли рэпер ва бастакор Алишер Моргенштерн 18 октябрь куни Instagram саҳифасида ўзининг Mercedes-Benz Э200 автомобили учун танлов эълон қилган эди. Унда бухоролик @aza_1002 аккаунти эгаси ғолибликни қўлга киритган.

Mercedes-Benz автомобилининг яна бошқа номи «Мерин» бўлиб, бастакор ўз композицияларидан бирини ушбу машинага бағишлаган (унда ҳақоратли сўзлардан кўп маротаба фойдаланилган). Қўшиқ Youtube`да эълон қилингач, тез фурсатларда 80 млн мартадан кўпроқ кўрилган. Моргенштерн автомобиль учун тахминан 4 млн рубль (51 минг АҚШ доллари) сарфлаган.

Giveaway доирасида (ижтимоий тармоқларда муайян ҳаракатлар эвазига, кўпинча обуна бўлиш эвазига совғалар тарқатиш) эълон қилинган танловда 907 мингдан ортиқ фойдаланувчилар қатнашди. Моргенштерн бухоролик ғолиб йигит билан боғланган ва автомобилни шахсан ўзи етказиб беришини қайд этган.

«Мен автомобилни дунёнинг ҳар қандай нуқтасига етказиб беришни ваъда қилганман. Ўзбекистон бўлса, Ўзбекистон-да. Агар чегаралар ёпиқ бўлса, кутишимиз мумкин. Чегаранинг ўзида машинани ўтказиб бериш ҳам мумкин. Божхона расмийлаштируви талаб қилинса, уни ҳам тўлаймиз», — деди бастакор.

Рэпер Ўзбекистонда божхона расмийлаштируви учун сарфланадиган ҳаражатлар ҳақида хабар топгач, ўз Stories`ида видеохабар қолдирган.

«Ўзбекистонда машина учун божхона тўлови қанча эканини биласизми? Машина нархига тенг экан», — деди Моргенштерн.

Тўғридан-тўғри эфири вақтида у машинани етказиб беришда ёрдам кераклиги ҳақида ҳам гапирган.

«Биз шов-шув кўтариб борамиз ва машинани ҳамюртингизга топширамиз. Сизлар ҳам бизга пешвоз чиқинг», — деган Моргенштерн. Бухоролик йигит рэпер билан мулоқот давомида унинг Instagram профилини «бузиш»га уринишлар бўлаётганини билдириб, аккаунтини ёпиб қўйган.

Моргенштерн ким

Алишер Валиев (Моргенштерн тахаллуси бўлиб, немисчадан таржима қилганда «тонгги юлдуз» маъносини англатади) 12 ёшида рэп айтишни бошлаган, юқори синфда ўқиб юрган вақтларида «қора алкоголизм» йилларини ўтказиб, дунёга машҳур рэп-юлдузларнинг ҳаёти ҳақида куйлаган. Уфалик 22 ёшли мусиқачи Z авлоди ҳавас қиладиган хонандага айланган ва тўғридан-тўғри эфирда оддий, содда трекларини ижро этиб, миллионлаб даромад қилмоқда, дея ёзмоқда Forbes.

Илк бор Моргенштерн ўзгаларнинг қўшиқлари ортидан танилган: 2018 йилда у машҳур ижрочиларнинг (Элжей, Кизару ва Face), оммалашган қўшиқларини ўзида жамлаган «ИзиРэп» туркумидаги видеоларни тайёрлади ва унда бу каби содда репларни ҳар қандай одам ижро этиши мумкинлигини тушунтириб ўтди.

Журналист Николай Редкиннинг Meduza учун тайёрлаган мақоласида, — Алишер бошқалар йўллаган салбий муносабатлардан устамонлик билан фойдаланмоқда ва YouTube`да реакциялар яхши баҳоланишини инобатга олиб, бу каби терапия қанчалик ўткир бўлса шунча яхши эканини англаб етган, — дейилади. 2018 йилда у илк албомини чиқарди, Россия бўйлаб турга йўл олди ва камера учун 100 минг рублни ёқиб юборди. Кейинроқ у ушбу ҳаракатига изоҳ берар экан, бу эътиборни осон ва тез тортиш усули эканини қайд этди. Оммалашган блогернинг ишлаб топаётган пуллари муҳокама қилинаётганидек кўп эмас.

2019 йил якунида бастакор қўшиқлари албомини тўғридан-тўғри эфирда ёзишини эълон қилди ва ростдан ҳам ҳар бир студия сессиясини эфирга узатиб борди. Якунда ҳосил бўлган релизга «Легендарная пыль» — афсонавий чанг (2020 йилнинг январь ойида сотувга чиққан) деб ном берди, уни барча стриминг сервисларида 500 млн мартадан кўп тинглашган (сентябрь ҳолатига), албомнинг ҳар бир треки «платинали» диск даражасига етган. Унинг қўшиқларида ҳақоратли сўзлар ва сўкинишлар кўплаб учрайди.