O‘zbekiston hukumati hokimiyatlarga kommunal xizmatlar tariflarini qayta ko‘rib chiqishni tavsiya qildi. Bu Vazirlar Mahkamasining 15-sentabrdagi yoqilg‘i-energetika tarmog‘ida bozor mexanizmlarini bosqichma-bosqich joriy etish to‘g‘risidagi qarorida nazarda tutilgan.
Vazirlar Mahkamasi Qoraqalpog‘iston Vazirlar Kengashi, viloyatlar hokimliklari va Toshkent shahri hokimiyatlariga issiqlik ta’minoti, suv ta’minoti va kanalizatsiya xizmatlari, shahar yo‘lovchi transportida (taksilardan tashqari) yo‘lovchilarni tashish xizmatlari uchun yangi tariflarni belgilashni tavsiya qilmoqda.
Shu bilan birga, joriy kuz-qish mavsumida aholi uchun issiqlik ta’minoti xizmatlari narxi oshmasligi qayd etilgan.
Iqtisodiyot va moliya vazirligiga tariflarni qayta ko‘rib chiqishda narxlarning asossiz oshib ketishiga yo‘l qo‘ymaslik topshirig‘i berilgan.
Vazirlar Mahkamasi huzuridagi Idoralararo tarif komissiyasiga 2023-yil 1-oktabrdan boshlab quyidagilarni qayta ko‘rib chiqish topshirilgan:
- tabiiy gaz va elektr energiyasini ishlab chiqarish, uzatish, taqsimlash, sotish tariflarini hamda issiqlik energiyasini ishlab chiqarish tariflarini;
- elektr va issiqlik energiyasi, shuningdek, tabiiy gaz iste’molchilaridan va ulgurji qayta sotuvchilardan tushadigan mablag‘larni taqsimlash tartibini;
- temir yo‘l transportida yuk va yo‘lovchilarni tashish xizmatlari va boshqa tariflarni.
Avval xabar berganimizdek, 2023-yilning birinchi yarmida O‘zbekiston Davlat budjetidan ayrim xizmatlar uchun tariflarning pasaytirilgan ekani tufayli ko‘rilgan zararlarni qoplash uchun 10 trln so‘mdan ortiq mablag‘ ajratilgan. Issiqlik ta’minoti korxonalariga 901,9 mlrd so‘m ajratilgan, buning 92 foizi Toshkent shahri hissasiga to‘g‘ri keladi. Gaz narxidagi tafovutni qoplash uchun 8,8 trln so‘m ajratildi. “Toshshahartransxizmat” aksiyadorlik jamiyati Toshkent shahrida yo‘lovchilarni pasaytirilgan tariflarda tashigani uchun tafovutni qoplash maqsadida budjetdan 220,9 mlrd so‘m oldi, “Toshkent metropoliteni”ga 96,7 mlrd so‘m ajratildi.
Eslatib o‘tamiz, avgust oyida O‘zbekistonning uchta viloyatida ichimlik suvi tariflari oshirilgandi, Samarqandda esa jamoat transportida yo‘lkira narxlari o‘zgargandi. 1-oktabrdan boshlab yirik korxonalar, budjet tashkilotlari, kompaniyalar va boshqa yuridik shaxslar uchun elektr energiyasi va gaz narxi oshadi. Aholi uchun tariflar hozircha o‘zgarishsiz qolmoqda, biroq ular ham 1-maydan boshlab oshirilishi mumkin.
