Vazirlar Mahkamasining 15 fevraldagi qarori bilan prezident sovrini uchun «Raqamli texnologiyalar yo‘nalishida eng yaxshi startap» (President Tech Award) tanlovini o‘tkazish tartibi to‘g‘risida nizom tasdiqlandi. Bu haqda Adliya vazirligining Telegram`dagi «Huquqiy axborot» kanalida ma’lum qilindi.

Tanlov 2023 yil may oyidan har yili quyidagi 5 ta asosiy yo‘nalish bo‘yicha o‘tkaziladi:

  • sun’iy intellekt texnologiyalari;
  • ijtimoiy yo‘nalishda raqamli texnologiyalar;
  • axborot va kiberxavfsizlik texnologiyalari;
  • tadbirkorlik va moliyaviy texnologiyalar;
  • kompyuter va mobil o‘yin dasturlari.

72 soat ichida raqamli yechim yaratishni nazarda tutuvchi Xakaton gran-prisi esa maxsus yo‘nalishga aylanadi (100 000 dollar (bitta g‘olib)).

Tanlovning asosiy yo‘nalishlarida 30 yoshga to‘lmagan O‘zbekiston fuqarolari bir jamoa tarkibida (3−8 kishi) qatnashadi.

Maxsus yo‘nalishda Dasturiy mahsulotlar va axborot texnologiyalari texnologik parki rezidenti bo‘lgan tashkilotlarda ishlayotgan chet el fuqarolari va fuqaroligi bo‘lmagan shaxslar ham (3−5 kishi) ishtirok etishi mumkin.

"Gazeta.uz"da reklama

Tanlov g‘oliblari quyidagi tartibda aniqlanadi:

  • asosiy yo‘nalishlar bo‘yicha — jamoatchilik tomonidan maxsus portalda ovoz berish orqali;
  • maxsus yo‘nalish bo‘yicha — axborot-kommunikatsiya texnologiyalari sohasida xizmatlar ko‘rsatuvchi tashkilotlar tomonidan.

Tanlov g‘oliblari quyidagicha taqdirlanadi:

5 ta asosiy yo‘nalish bo‘yicha:

  • 1-o‘rin uchun — 100 ming dollar;
  • 2-o‘rin uchun — 50 ming dollar;
  • 3-o‘rin uchun — 30 ming dollar;
  • maxsus yo‘nalish bo‘yicha (bitta) — 100 ming dollar.

Tanlovda ishtirok etish uchun pul undirilmaydi.

IT matbuot xizmatining aniqlik kiritishicha, tanlov 5 bosqichda o‘tkaziladi:

  • arizalarni qabul qilish — 1 maydan 1 iyulgacha;
  • dastlabki saralash — 1 iyuldan 25 iyulgacha;
  • tanlangan loyihalarni onlayn baholash — 5 sentabrdan 5 oktabrgacha;
  • oflayn baholash (demo kuni) — 5 noyabrdan 10 noyabrgacha;
  • g‘oliblarni aniqlash va taqdirlash — 20 noyabr — 25 dekabr.

Eslatib o‘tamiz, davlat rahbari 2022 yil iyul oyida IT sohasida yosh iqtidorlarni aniqlash bo‘yicha prezident tanlovini o‘tkazish tashabbusini qo‘llab-quvvatlagan va uning sovrin fondiga 1 million dollar ajratishni taklif qilgan edi.