Вазирлар Маҳкамасининг 15 февралдаги қарори билан президент соврини учун «Рақамли технологиялар йўналишида энг яхши стартап» (President Tech Award) танловини ўтказиш тартиби тўғрисида низом тасдиқланди. Бу ҳақда Адлия вазирлигининг Telegram`даги «Ҳуқуқий ахборот» каналида маълум қилинди.

Танлов 2023 йил май ойидан ҳар йили қуйидаги 5 та асосий йўналиш бўйича ўтказилади:

  • сунъий интеллект технологиялари;
  • ижтимоий йўналишда рақамли технологиялар;
  • ахборот ва киберхавфсизлик технологиялари;
  • тадбиркорлик ва молиявий технологиялар;
  • компьютер ва мобил ўйин дастурлари.

72 соат ичида рақамли ечим яратишни назарда тутувчи Хакатон гран-приси эса махсус йўналишга айланади (100 000 доллар (битта ғолиб)).

Танловнинг асосий йўналишларида 30 ёшга тўлмаган Ўзбекистон фуқаролари бир жамоа таркибида (3−8 киши) қатнашади.

Махсус йўналишда Дастурий маҳсулотлар ва ахборот технологиялари технологик парки резиденти бўлган ташкилотларда ишлаётган чет эл фуқаролари ва фуқаролиги бўлмаган шахслар ҳам (3−5 киши) иштирок этиши мумкин.

"Газета.uz"да реклама

Танлов ғолиблари қуйидаги тартибда аниқланади:

  • асосий йўналишлар бўйича — жамоатчилик томонидан махсус порталда овоз бериш орқали;
  • махсус йўналиш бўйича — ахборот-коммуникация технологиялари соҳасида хизматлар кўрсатувчи ташкилотлар томонидан.

Танлов ғолиблари қуйидагича тақдирланади:

5 та асосий йўналиш бўйича:

  • 1-ўрин учун — 100 минг доллар;
  • 2-ўрин учун — 50 минг доллар;
  • 3-ўрин учун — 30 минг доллар;
  • махсус йўналиш бўйича (битта) — 100 минг доллар.

Танловда иштирок этиш учун пул ундирилмайди.

IT матбуот хизматининг аниқлик киритишича, танлов 5 босқичда ўтказилади:

  • аризаларни қабул қилиш — 1 майдан 1 июлгача;
  • дастлабки саралаш — 1 июлдан 25 июлгача;
  • танланган лойиҳаларни онлайн баҳолаш — 5 сентябрдан 5 октябргача;
  • офлайн баҳолаш (демо куни) — 5 ноябрдан 10 ноябргача;
  • ғолибларни аниқлаш ва тақдирлаш — 20 ноябрь — 25 декабрь.

Эслатиб ўтамиз, давлат раҳбари 2022 йил июль ойида IT соҳасида ёш иқтидорларни аниқлаш бўйича президент танловини ўтказиш ташаббусини қўллаб-қувватлаган ва унинг соврин фондига 1 миллион доллар ажратишни таклиф қилган эди.